– "Нефтчи" ҳақида илк таассуротларингиз...
– Биринчи навбатда, Фарғона шаҳрига улкан миннатдорчилик билдираман, бундан ташқари Ўзбекистондаги барча мухлисларимизга ташаккур изҳор этаман. Мен бу ерда эканлигимдан жуда мамнунман. Менга бу шаҳар ва мухлисларнинг ўз жамоасига бўлган муҳаббати жуда ёқди. Очиғини айтганда, бу ерда тўп тепиш – мен учун катта шараф.
– Франция чемпионатидан Ўзбекистон чемпионатиша кўчиб ўтишингизга нима туртки берди?
– "Нефтчи" жамоаси сафига қўшилишим учун кўплаб сабаблар мавжуд эди. Биринчидан, "Нефтчи"нинг лига чемпиони эканлиги ҳамда Чемпионлар лигасидаги иштироки ушбу жамоага ўтишимга мотивация берди. Кўплаб таклифлар бўлишига қарамай, "Нефтчи" менга кўпроқ имкониятларни таклиф эта олди ва бу тезроқ қарор қабул қилишимга ёрдам берди.
– "Нефтчи"дан таклиф тушган маҳал клуб ҳақида қандай маълумотларга эга эдингиз?
– Бу ерга келишимдан олдин менда Ўзбекистон футболи ҳақида ҳеч қандай маълумот йўқ эди, фақатгина Абдуқодир Ҳусановни танир эдим. Жаҳон чемпионатида Ўзбекистоннинг Португалияга қарши ўйинини томоша қилганимдан сўнг ва жамоа мураббийи билан суҳбатлашгач, кўплаб маълумотларга эга бўлдим. Ўзбекистонга келганимдан сўнг англадимки, бу ерда юқори савиядаги жамоалар ва футболчилар жуда кўп.
– "Нефтчи" мураббийи суҳбатда нималар ҳақида гаплашдингиз?
– Мавсум якунланганидан сўнг, агентим "Нефтчи" жамоасидан таклиф борлигини ва жамоа мураббийи шахсан мен билан суҳбатлашмоқчи эканлигини маълум қилди. Ўша вақтда мен Дубайда эдим ва ўзимни жуда тушкун ҳолатда ҳис қилаётгандим. Жамоа мураббийи билан боғланганимдан сўнг, у менга ўз тактикаси, юришлари ва жамоанинг асосий мақсадлари ҳақида сўзлаб берди. Қийин кечган мавсумдан сўнг, мен бу таклифни ўзим учун янги чорлов сифатида қабул қилдим ва 24 соат ичида унга розилигимни билдирдим.
– Ўзбек футболи ва дебют голингиз ҳақида нима дея оласиз?
– Одамлар Ўзбекистон лигасини кучсиз ва рақобатсиз деб ўйлашлари мумкин, лекин бу ҳақиқатдан йироқ. Бу лига ҳақиқатан ҳам жуда мураккаб, шунингдек, юқори савияли ўйинчилар тўп тепадиган кўплаб етакчи жамоалар мавжуд. Бу эса лиганинг ривожланишига катта ҳисса қўшади. "Андижон"га қарши дебют ўйинимга келсак, бу учрашув мен учун жуда мураккаб ва қийин кечди. "Андижон"га киритилган гол жуда тез юз берди, ҳатто ўзим ҳам нима бўлганини англай олмай қолдим. Францияда маълум муддат расмий ўйинларда майдонга тушмаганим сабабли жисмоний ҳолатимни тиклашимга тўғри келди ва ҳозирда ҳар бир ўйинда жисмоний жиҳатдан ўсиб бораётганимни ҳис қилмоқдаман.
– Жамоага тез фурсатда қўшилиб кета олганингиз нима билан боғлиқ?
– Мен доимо ҳақиқий жангчи эканлигимни такрорлаб келганман. Ҳар қандай ҳолатда ҳам жамоамга ёрдам бериш – менинг асосий мақсадим. "Андижон"га қарши киритган илк голим ва "Нефтчи" сафидаги инглиз тилида сўзлашувчи футболчилар жамоага тезроқ мослашиб кетишимга ёрдам беришди. Шу сабабли, ушбу жараёнда менга кўмак берган ҳар бир инсонга ўз ташаккуримни билдираман.
– Клубдагилар орасида сиз каби қувноқ футболчилар борми?
– Жамоадошларимга хурсандчилик улаша олганимдан жуда мамнунман. Аброр Исмоилов ҳазилкан, Анвар Ғафуров ва баъзида Икром – жамоа кайфиятини кўтариб турувчи футболчилар. Асосан, мен ва ушбу уч нафар футболчи жамоада кўп ҳазил қиламиз.
– Ўзбекистон терма жамоасининг ўйинини томоша қилдингизми, маҳаллий жамоадошларингизни миллий лигаларда имкониятини қандай баҳолайсиз?
– Очиғини айтганда, учрашувни уйда, телевизор орқали томоша қилдим. Терма жамоангиз яхши савиядаги футболчилардан ташкил топган, бундан ташқари, жамоани номдор мураббий бошқармоқда. Футболчилар салоҳиятига келсак, жамоадошларимнинг ҳар бири топ-чемпионатларда тўп тепиш имконияти мавжуд. Ёшлар эса тўхтаб қолмасликлари ва ҳар бир имкониятдан унумли фойдаланишлари зарур.
– "Нефтчи" мухлислари ҳақида фикрингиз...
– Бу ерга келишимдан аввал жамоанинг бир учрашувини томоша қилган эдим. Унда мухлислар ўзларининг ажойиб чиқишлари билан ажралиб туришганди. Улар мени аэропортда илиқ кутиб олишди ва мен ҳар бир учрашувда ғалаба қозониб, уларни хурсанд қилишга ваъда бераман. Уларга айтар сўзим шуки, бизни доимо қўллаб-қувватлашсин ва шу руҳда давом этишсин.
Қадрланмаган садоқат: "Нефтчи"нинг янги легионери билан яқиндан танишамиз
