Тарихга назар
Шу пайтгача мусобақа 11 бор ўтказилган бўлиб, дастлабки U-20 Осиё чемпионати 2002 йилга тўғри келади. Ўшанда биринчи халқаро турнирга Ҳиндистон мезбонлик қилган бўлиб, Япония U-20 қизлар терма жамоаси чемпионликни қўлга киритганди. Қуйида мусобақага мезбонлик қилган мамлакатлар ҳамда барча чемпионларни келтириб ўтамиз.
2002. Мезбон - Ҳиндистон. Чемпион - Япония
2004. Мезбон - Хитой. Чемпион - Жанубий Корея
2006. Мезбон - Малайзия. Чемпион - Хитой
2007. Мезбон - Хитой. Чемпион - Шимолий Корея
2009. Мезбон - Хитой. Чемпион - Япония
2011. Мезбон - Вьетнам. Чемпион - Япония
2013. Мезбон - Хитой. Чемпион - Жанубий Корея
2015. Мезбон - Хитой. Чемпион - Япония
2017. Мезбон - Хитой. Чемпион - Япония
2019. Мезбон - Таиланд. Чемпион - Япония
2024. Мезбон - Ўзбекистон. Чемпион - Шимолий Корея
2002. Мезбон - Таиланд. Чемпион - ???
Эътибор берган бўлсангиз, ушбу мусобақага мезбонлик асосан Шарқий Осиё давлатларига берилган бўлиб, фақат аввалги турнир мезбонлиги Марказий Осиё мамлакати Ўзбекистонга топширилди. U-20 қизлар ўртасидаги Осиё чемпионатида энг кўп чемпионлик Японияга насиб этган - 6 марта.
Ўзбекистон U-20 қизлар терма жамоаси қитъа биринчилигида ҳозиргача 5 марта иштирок этган бўлиб, ўз иштирокини ҳар доим гуруҳ босқичида якунлаган. Ўзбекистон U-20 терма жамоасининг иштироки 2002, 2004, 2015, 2017 ҳамда 2024 йилги мусобақаларга тўғри келади.
Гуруҳлар ва жамоалар
Бу йилги U-20 Осиё чемпионатида 12та жамоа иштирок этади ва жамоалар тўрттадан уч гуруҳга бўлинган.
A гуруҳи: Таиланд, Хитой, Вьетнам, Бангладеш.
B гуруҳи: Шимолий Корея, Жанубий Корея, Ўзбекистон, Иордания.
C гуруҳи: Япония, Австралия, Хитой Тайпейи, Ҳиндистон.
Гуруҳ ўйинларимиз:
2 апрель. 14:00. Жанубий Корея - Ўзбекистон
5 апрель. 18:00. Ўзбекистон - Шимолий Корея
8 апрель. 18:00. Ўзбекистон - Иордания
Мусобақа форматига кўра, ҳар бир гуруҳдан биринчи-иккинчи ўринлар билан биргаликда энг яхши иккита учинчи ўрин эгаси (жами 8та жамоа) чорак финалга йўл олади. Шу йилнинг 5-27 сентябрь кунлари Польшада бўлиб ўтадиган U-20 қизлар Жаҳон чемпионатига Осиё учун 4та йўлланма ажратилган бўлиб, Осиё чемпионати ярим финалига чиққан барча тўртта жамоа мундиал йўлланмасига эга бўлади. Маълумот учун, Жаҳон чемпионатида 24та терма жамоа иштирок этади.
Стадионлар
Таиланддаги U-20 Осиё чемпионатига иккита шаҳар - Патум Тани ва Нонтабури мезбонлик қилади ҳамда ўйинлар учта стадионда ўтказилади. Ўзбекистон U-20 қизлар терма жамоамиз гуруҳ ўйинларини ҳар икки шаҳарда ўтказади.
1. Thammasat Stadium - сиғими 25 минг
2. Pathum Thani Stadium - сиғими 15 минг
3. Nonthaburi Province Stadium - сиғими 10 минг
Рақиблар ва имкониятлар
Гуруҳдаги рақибларимиз кучли деб бемалол айта оламиз. Масалан, Жанубий Корея билан Шимолий Корея бунгача икки марта Осиё чемпионлигини қўлга киритган. Шунингдек, Иордания ҳам ўзига яраша кучга эга. Лекин ўйлаймизки, Владимир Панов бошчилигидаги қизларимиз ўзларини кўрсата олишди. Дарвоқе, кеча мусобақа олдидан мураббийлар иштирокида матбуот анжумани ташкил қилинди ва терма жамоамиз устози инглиз тилида бемалол ўз фикрини баён этгани кишини хурсанд қилди.
Ушбу мусобақа ҳам қизиқ ўтиши кутилмоқда, негаки ўртага Жаҳон чемпионати йўлланмаси тикилган. Куни кеча ОФК сайти ҳар бир жамоанинг қизларига тўхталиб, Ўзбекистондан "Севинч" футболчиси Зарина Норбоевани алоҳида эътироф этди. Мусобақа низомига кўра, Осиё чемпионатида иштирок этиш учун Владимир Панов 23талик рўйхатни ОФКга тақдим этган бўлиб, таркибга "Сўғдиёна", "Бунёдкор", "Қизилқум", "Локомотив", "Севинч", ОКМК ва "Нефтчи" клубларидан иқтидорли қизлар таклиф этилган. Қизларимизга бўлажак мусобақада омад тилаб қоламиз.
Хайрулла Холиқов
