– Ўйин ҳақида...
– Ҳамма айтадиган гап, ўйин шундай қийин бўлишини билгандик. Бунақа жамоаларга қарши ўйиндан олдин футболчи ўзини енгиб, майдонга чиқиши керак. Қўрқмасдан ўйнаш керак. Йигитлар зўр ўйнади, фақат мен эмас, ҳамма зўр ўйнади, деб ўйлайман. Хуллас, яхши ўйин бўлди. Ҳисоб 0:0 бўлган бўлса ҳам, мухлисларга ёқадиган чиройли ўйин бўлди.
– Якка тарзда, масалан, "Нефтчи"ни тўхтатиб қолдингиз. Орада нима ўзгариш бўлди?
– Иванков иш бошлади. Энди, барибир мавсум бошланганда кимдир зўр ўйнаб кетиши мумкин, кимдадир бу ўхшамаслиги мумкин. Бизда ҳам худди шунақа ҳолат бўлди. Яхши бошламадик. Иккала дарвозабон ҳам қаердадир хато қилдик, жамоани қутқара олмадик. Энди, Худога шукур, ўша хатоларимизнинг ўрнини секин-секин ёпяпмиз.
– Олмалиққа қайтганинглар қанчалик далда беряпти?
– Ҳар доим айтишади-ку, "Деворлар ҳам ёрдам беради", деб. Мухлислар келяпти. Кам мухлис бўлса ҳам, лекин яхши қўллаб-қувватлашяпти. Мухлисларнинг стадионга кўпроқ келишини хоҳлаймиз. Секин-секин йигитлар яхши формага киряпти. Шунингдек, жамоамизга янги қўшилганлар бор эди, бошида мураббийимизнинг кўп кўрсатмаларини тушунмаётган бўлишимиз мумкин ёки қаердадир охиригача бажармаётган эдик. Ҳозир 100 фоиз бажаришяпти, шунинг орқасидан натижалар келяпти, ўйинлар яхши, ҳамма бир-бирини тушуниб, тўғри ҳаракат қиляпти.
