– Ўйин ҳақида фикрингиз...
– Жуда ҳам қизиқарли ўйин бўлди. Ўйлайманки, икки жамоа ҳам ғалаба қозониш учун максимал даражада ҳаракат қилди. Барибир рақиб жуда ҳам тажрибали футболчилардан йиғилган жамоа эканлиги иккинчи бўлимда ҳам кўриниб турди ва тажриба ўз сўзини айтди. Афсуски, бизнинг йигитлар стандарт вазиятларда диққатни йўқотишди. Учинчи гол ҳам ён чизиқдан тўп киритилганидан сўнг ўтказиб юборилганини ҳисобга олсак, деярли барча голлар стандарт вазиятларда урилди. Демак, бунинг устида ишлашимиз керак. Стандарт вазиятлардаги концентрацияни йўқотишимиз бизга қимматга тушди. Ўйин назорати томонлама кўпроқ биз устунлик қилдик. Ривожланишда давом этамиз. Йигитлар бундай учрашувлардан, айтишим мумкинки, жуда ҳам катта тажриба орттиришмоқда.
– Бундан олдинги турда Про лига етакчиси "Арал" жамоаси билан ўйинда кўп куч сарфландими? Шу сабабли бугунги ўйинда футболчиларда чарчоқ сезилдими?
– Йўқ, бизда тикланиш учун етарли вақт бўлди. Йигитлар жисмоний ҳолатини яхши тиклаб олишган эди. Бугун бироз чарчоқ сезилди, лекин буни йўл чарчоғи деб баҳолашим мумкин. Барибир йигитларимиз ёш, майдонда борини бериб ўйнашяпти. Уларда ўйин давомида балансни ушлаш, кучни тўғри тақсимлаш – бу маҳорат билан шаклланадиган жиҳат. Шу сабабли, вақти келиб бу борада ҳам керакли тажрибага эришамиз.
– Биринчи бўлимда жамоангизнинг ўйини қовушаётган эди ва ҳисобда ҳам олдинда бораётган эдинглар. Иккинчи бўлимда ўйиннинг асосий бурилиш нуқтаси нима бўлди деб ҳисоблайсиз? Ушбу ўзгаришларга нима сабаб бўлди?
– Дарҳақиқат, тўғри таъкидлаб ўтдингиз. Жуда ҳам яхши ўйин бўлди, биринчи бўлимда ҳисоб ҳам, ўйин темпи ҳам бизнинг назоратимизда, режадагидек кетаётган эди. Юқорида таъкидлаб ўтганимдек, стандарт вазият ва унда диққатни йўқотишимиз оқибатида ўтказиб юборилган гол бизни яна олдинга чиқишга ундади. Бу эса эҳтиёткорсизликка олиб келди ва жуда қисқа вақт ичида иккинчи голни ҳам ўтказиб юбордик. Менинг айтмоқчи бўлганим шуки, ёш йигитларда барибир маҳорат етишмаслиги мана шундай вазиятларда сезилиб қолади. Чунки биз голни иккинчи бўлимнинг дастлабки дақиқаларида ўтказиб юбордик, ўйин тизгинини яна ўз қўлимизга олиш учун вақтимиз етарли эди.
Агар хотиржамлик билан позицион ҳужумларга ўтганимизда, мақсадга мувофиқ бўларди. Сабаби, бугунги учрашувда позицион ҳужумлар бизда жуда яхши чиқди ва кўплаб хавфли вазиятлар яратдик. Худди шундай давом этишимиз керак эди. Мен қўлдан келганча майдон четидан футболчиларимга шошмасликни, хотиржам бўлишни ва бизда вақт етарли эканлигини уқтирган бўлсам-да, йигитлар барибир олдинга бироз шошилишди. Натижада иккинчи голни ҳам ўтказиб юбордик. Бу гол ҳам стандарт вазиятдан киритилди. Учинчи гол урилган вақтда эса биз бор кучимиз билан ҳужумга чиқиб бўлган эдик, орқа чизиқда бўшлиқлар пайдо бўлди ва куч йўқотдик.
– Жамоангиз чиндан ҳам яхши ўйин кўрсатди. Аввалги турда ҳам, бу турда ҳам Суперлигага йўлланма олиш вазифаси қўйилган жамоаларга муносиб қаршилик кўрсата олди. Бугунги ўйиндан келиб чиқиб, ўз жамоангизга эмас, балки "Металлург" жамоасининг ҳаракатларига қандай баҳо берасиз?
– Рақиб ҳақида гапирадиган бўлсак, уларда жуда тажрибали футболчилар йиғилган. Ҳар томонлама, ҳаттоки керакли вақтда ҳакамга ҳам босим ўтказа олишяпти. Улар шу даражада маҳоратли жамоа ҳисобланади. Барибир бугунги ўйинда тажриба ўз сўзини айтди. Лекин тўпни назорат қилиш, тактик интизомга риоя этиш ва тезкорлик борасида бизнинг йигитлар рақибга нисбатан анча яхшироқ ҳаракат қилишди. Рақиб жамоа иккинчи даврада анча кучайган. Майдондаги ҳаракатлар, тезлик ва спринтлар сезиларли даражада кўпайган. Уларга кейинги ўйинларда омад тилаб қоламан.
