Ислом Қобилов: "Захирадан тушган жамоадошлар билан ўйинни кучайтириб, бир очкони қўлга киритишга муваффақ бўлдик"

– Бугунги ўйин қандай таассурот қолдирди? "Сўғдиёна" илк очкосини қўлга киритди...

– Ўйинга пухта тайёргарлик кўргандик. Иложи борича, оддийроқ ўйин ўтказмоқчи эдик. Мураббийимизнинг кўрсатмаси билан биринчи голни уришга муваффақ бўлдик. Кейин ОКМК жамоаси ўйинни кучайтириб, олдинга чиқиб олди. Захирадан тушган жамоадошлар билан ўйинни кучайтириб, биз ҳам бир очкони қўлга киритишга муваффақ бўлдик.

– ОКМК ва "Сўғдиёна" жамоалари иштирокидаги охирги ўйинларда камида учта гол урилмоқда. Бу рақибнинг очиқ ўйин кўрсатиши билан боғлиқми ёки бошқа сабаблар ҳам борми?

– Албатта, бунга очиқ ўйин сабаб. Миржалол Қосимов ҳам шундай услубни хуш кўради, бизнинг мураббийимиз ҳам очиқ ўйин тарафдори. Ўйин аввалида 15-20 дақиқа жамоалар эҳтиёткорлик билан ҳаракат қилишар, лекин кейинчалик икки жамоа ҳам очиқ ўйинга киришиб кетади. Шунга голлар кўпаяди.

– "Сўғдиёна"нинг олдига қўйилган вазифа, мақсадлар ҳақида...

– "Сўғдиёна" охирги 3-4 йилдан бери фақат юқори ўринларни мақсад қилган. Мавсум старти кўнгилдагидек бўлмади. Иложи борича, очколарни қўлга киритиб, мавсумни юқори ўринларда якунлашга ва Кубокда узоқроққа боришга ҳаракат қиламиз.