5 ноябрь куни 41 ёшли форвард ижтимоий тармоқларда мурожаат эълон қилди. У видео орқали миллий жамоадаги фаолиятига нуқта қўйганини маълум қилди.
"Дунё бўйлаб жуда кам сонли футболчилар мухлислар қалбидан Роналду сингари жой ола билган. У футбол бўйича олтита турли Жаҳон чемпионатида гол урган тарихдаги биринчи футболчи ва эркаклар терма жамоалари ўртасидаги энг яхши тўпурарга айланди. Эҳтимол, Криштиану ҳеч қачон такрорланмайдиган чўққиларни забт этди, бироқ унинг буюк мероси рекордлар, совринлар ва голлар доирасидан анча кенгроқдир.
У авлодларни илҳомлантирди, миллионлаб мухлисларни бирлаштирди ҳамда энг улкан дунё ареналарида Португалиянинг умиди ва ғурурини намоён этди. Сенга эҳтирос, унутилмас лаҳзалар ва бизнинг гўзал ўйинимизга қўшган беқиёс ҳиссанг учун раҳмат, Криштиану! Сенинг халқаро фаолиятинг абадий футбол тарихининг бир қисми бўлиб қолади", – деди Инфантино.
Роналду 2003 йилдан буён Португалиянинг асосий терма жамоасида тўп тепиб келди ва унинг сафида 234 та ўйин ўтказиб, 146 та гол урди. Миллий терма жамоалар тарихидаги голлар сони бўйича жаҳон рекорди айнан унга тегишли. Португалия терма жамоаси билан бирга ҳужумчи 2016 йилда Европа чемпиони бўлган ҳамда икки бор Миллатлар Лигасида (2018/19, 2024/25) ғалаба қозонган.
