"Меҳмондўстлик учун раҳмат. Биз бу ерга ўзимизга бўлган ишонч билан етиб келдик. Мундиал иштирокчисига қарши ўйнаймиз. Яхши ўйин намойиш этиб, яхши кайфиятда уйга қайтамиз деган умиддаман", - дея фикр Габон терма жамоаси бош мураббийи Ансиет Яла.
- Ўзбекистон терма жамоасининг қайси жиҳатларини таъкидлаб ўтган бўлар эдингиз?
- Терма жамоангиз кучли футболчиларга эга. Албатта "Сити" ўйинчисини бутун дунё танийди. Шунингдек, кўплаб ёш ва иқтидорли футболчилар мавжуд. Терма жамоа шунчаки жаҳон чемпионатига чиқиб қолмайди. Бундай рақибга қарши ўйнаш биз учун чақирув бўлади.
- Обамеянг терма жамоага чақирилмаганининг сабаби нимада? Ҳусановга қарши қандай ўйнамоқчисизлар?
- Барчангиз биласиз, Обамеянг бизнинг асосий етакчимиз. У ҳозирги кунда клубига ёрдам бериши керак ва шу сабабли таркибимизда эмас. Унинг клуби Франция чемпионатидаги иштирокини давом эттирмоқда ва натижалари қониқарсиз. Шу сабабли клуб футболчини ўз ихтиёрида олиб қолишни илтимос қилди. Биз клубнинг сўровини қабул қилдик. Ушбу учрашувлар орқали ёш футболчиларга имкон берамиз. Ёшларимиз эса тажриба орттиради.
Ҳусанов катта иқтидор. "Сити"дек катта клубда ўйнамоқда, аммо футболни 11 киши ўйнайди. Тактик жиҳатдан унинг кучли жиҳатларини бартараф этишга ҳаракат қиламиз.
- Кеча Габон терма жамоасининг машғулотларини томоша қилдим. Габон таркибида бўйдор ва гавдали футболчилар кўп экан. Ўзбекистон эса кўпроқ техникаси юқори футболчиларга таянади. Шундан келиб чиқиб, эртага қандай футбол намойиш этмоқчисиз?
- Биз ўз уйида ўйнаётган жамоа билан тўқнаш келамиз. Ўзбекистон ФИФА рейтингида 52-ўринда, биз эса 84-ўриндамиз. Тўғри, назарий жиҳатдан терма жамоалар ўртасида фарқ бордек, аммо барчаси майдонда ҳал бўлади. Бу ерга шунчаки турист сифатида ташриф буюрмадик. Биз бу ерга натижа учун келдик. Эртага майдонда жамоа ўзининг энг яхши ўйинини намойиш этишга ҳаракат қилади.
