Эквадор терма жамоаси ярим ҳимоячиси Мойсес Кайседо, Аргентина ҳимоячиси Николас Отаменди ва Қатар вакили Тариқ Салмон ЖЧ-2026 гуруҳ босқичининг илк турида иштирок этиш ҳуқуқини қўлга киритди. Бу ҳақда ESPN нашри хабар бермоқда.
Эслатиб ўтамиз, ўтган йилнинг сентябрь ойида ЖЧ-2026 саралаши доирасидаги Эквадор — Аргентина (1:0) учрашувида Кайседо ва Отаменди майдондан четлатилган эди. Қоидага кўра, улар жазо муддатини Жаҳон чемпионати финал босқичининг 1-турида ўтаб беришлари керак эди.
Шунингдек, октябрь ойида БААга қарши баҳсда (2:1) рақибга нисбатан ноахлоқий хатти-ҳаракатлари ва ҳакамга ташлангани учун дисквалификация қилинган Қатар терма жамоаси ҳимоячиси Тариқ Салмонга нисбатан ҳам худди шундай чеклов мавжуд эди.
ФИФА бюроси нега бундай қарорга келди?
Манбанинг хабарига кўра, президент Жанни Инфантино ва олтита қитъа футбол ташкилотлари президентларидан иборат ФИФА бюроси барча жамоалар учун тенг шароит яратиш ҳамда мусобақада энг кучли таркиблар иштирокини таъминлаш мақсадида бир ўйинлик дисквалификацияларни Жаҳон чемпионатига кўчирмасликка қарор қилган.
Қизиқарли жиҳати шундаки, футболчилар ўз жазоларини бекор қилмайдилар. Улар Жаҳон чемпионати якунланганидан кейинги илк расмий халқаро учрашувда ўзларининг тегишли дисквалификацияларини ўтаб беришлари шарт бўлади.
