Фарҳод Нишонов: "Агарда улар ўз сифатларини яхшилай олишмаса, топ-футболчи бўла олишмайди"

- Ўйин ҳақида фикрларингиз?

- "Локомотив" кучли, биз уларнинг таркибини яхши биламиз. Ўйинга яхши тайёргарлик кўрдик ва режа бўйича бошладик. Ўз футболчиларимга айтяпман: агарда улар ўз сифатларини яхшилай олишмаса, топ-футболчи бўла олишмайди. Шунча вазиятлар яратдик. Футболчиларда ўзига ишончсизликми, нима бўлди билмадим, бунақанги вазиятлардан фойдаланиши керак. Европада бундай вазиятлардан голлар урилади. Ўйин бўйича муаммо йўқ, баҳсни назорат қила олдик. Йигитлар курашишди, югуришди, бунга эътирозим йўқ. Бундай вазиятлардан гол ура олмасак, биз чемпион бўла олмаймиз. Ҳужумдаги футболчиларимга эътирозларим жуда катта. Ўзларини устида ишлашлари, техникасини ривожлантиришлари, сифат бобида ишлашлари керак. Акс ҳолда уларнинг ўзлари ҳам, ўзбек футболи ҳам ютмайди. Агарда фақат курашлардан иборат бўлса, футбол ўз чиройини йўқотиб қўяди. Сифат, пас, аниқлик бўйича футболчиларим кўп ишлаши керак. "Локомотив"ни табриклайман. Олдинда биттадан ўйинимиз қолди. Ушбу учрашувда ҳаракат қилиб, плей-офф йўлланмаси учун курашамиз.

- Сифат ҳақидаги гапларингиз тўғри. Бугун иккала жамоа ҳам тўпни йўқотишдан қўрқиб ўйнамадими?

- Футболчиларда бундай ҳаёл бор. Лекин вазиятларга қаранг, булардан гол уриш керак. Бу футболчининг даражасига боғлиқ. Бундай пайтда гол ура олмаса, ўзига ишонч бўлмайди. Гол урса, кейинги сафар ҳам гол уриши мумкин. Чунки ўзига ишончи ортади. Улардан Месси ёки Роналду бўлишларини сўрамаяпмиз, шунчаки оддий аниқ пас керак. Машғулотларда бу борада кўп ишланади, лекин муаммо бўлмайди. Ўйинга чиққанда муаммо кўриняпти. Ҳеч қайси мураббий майдонга тушиб, футболчисининг ўрнига гол ура олмайди. Суперлигага чиқишга курашаётган икки жамоага қарши ўйинни сифат ҳал қилишини билардик. "Локомотив"га эътибор беринг, битта ҳужумда битта гол урди. Биз-чи? Шунча вазиятлар, пенальтидан ҳам гол ура олмадик. Гол ура олмасак, ғалаба бўлмайди.

- Жамоа учинчи мавсум Про-лигада иштирок этмоқда, лекин Суперлигага чиқа олмаяпти. Бу жамоа терманинг асоси сифатида ташкил қилинган. Жамоанинг Суперлигага чиқишига нима ҳалақит қилмоқда?

- Бу Про-лигадаги иккинчи мавсумимиз. Эсдан чиқармаслик керак, "Локомотив" ҳам "Арал" ҳам кучсиз жамоа эмас. Балки жамоалар сони камлиги ҳам таъсир қилгандир. Фақатгина уч жамоа курашмоқда ҳолос. "Локомотив" таркибига қаранг, нечта легионери, қанча тажрибали футболчилари бор. Мен ҳам шу ёшдаги яхши футболчиларни олиб келишни истайман, лекин улар Суперлигада ўйнамоқда. Уларсиз қийин бўлади. Чунки шундай катта баҳсларда футболчиларнинг даражаси, техникаси, сифати муҳим ўрин тутади. Бизга етакчилар етишмаяпти. Қийин пайтда ноодатий қарорлар чиқарадиган, ўйинни ўзига оладиган футболчилар камлик қилмоқда. Терма жамоада бундай футболчилар бор. Шу сабабли улар ўзларини кўрсатишмоқда.