Европа топ-лигаларидан 136 нафар футболчи "йўқ" бўлиб қолди. Африка миллатлар кубоги режаларига ўзгартириш киритадиган клублар ҳақида

Бу борада энг катта азият чекканлар – Франциянинг икки клуби.

Африка Кубоги анъанавий равишда Европа клублари ва бутун лигалар учун муаммога айланади. Чунки мазкур мусобақа евро-мавсумнинг қоқ ўртасида ўтказилади. Жамоалар муҳим футболчиларини, чемпионатлар – мухлислар ва телеканаллар эътиборини ўзига жалб қиладиган юлдузларини йўқотади. Куни-кеча Марокашда старт олган Африка Кубоги–2025 ҳам бундан мустасно бўлмайди. Европанинг қайси лигасидан қанча футболчи Африкага йўл олгани, клублардаги вазият ҳақида суҳбатлашамиз.

Франция чемпионати – Лига 1"дан 51 футболчи

Африка Кубоги туфайли ҳаммадан кўра кўпроқ айнан Франция чемпионати азият чекиши сир эмас. Лига 1 ва қуйи дивизион вакиллари собиқ колония мамлакатлардаги иқтидорларни ўз таркибига жалб қилиши одат тусига кирган, ўз навбатида ёш футболчилар эса Эйфель минораси орзусида сафарга отланадилар. Африкаликлар француз футболига осон мослашишади, лекин танганинг иккинчи томони ҳам бор – қитъа мусобақаси вақтида каттагина "ишчи кучи" уйга бориб келади.

Африка Кубогида иштирок этувчи 24 терма жамоа таркибида фақатгина Лига 1"дан 51 (!) футболчи рўйхатдан ўтказилган. Лига 2 ҳам қисман зарар кўрган – Франциянинг иккинчи лигасидан ҳам саккиз нафар футболчи Марокашга йўл олган. "Transfermarkt" портали маълумотларига кўра, Франция чемпионати вакиллари ичида нархи энг баланди – ПСЖ ҳимоячиси Ашраф Ҳакими. Марокаш термаси етакчиси нафақат чемпионатнинг балки мусобақанинг энг қиммат футболчиси ҳамдир – 80 млн. евро. Нарх-наво борасида ТОП-5да яна уч нафар малилик футболчи бор – Ламин Камара ( "Монако", € 30 млн), Ибрагим Мбайе (ПСЖ) ва Мамаду Сарр ("Страсбург", € 25 млн), шу билан бирга марокашлик Найеф Агерд ("Марсель", € 22 млн).

Энг кўп футболчи "йўқотганлар" "Париж ФК ва "Лорьян". Лига 1"нинг ҳар икки клуби 5 нафардан футболчиси хизматидан вақтинча фойдалана олмайди. Парижликлар ҳимоячи Самир Шерги (Жазоир) ва Амари Траоре (Мали), вингерлар Илан Кеббаль (Жазоир) ва Мозес Саймон (Нигерия) ҳамда ҳужумчи Жан-Филипп Крассо (Кот-д’Ивуар) билан "хайрлашишга" мажбур бўлган. Шу ўринда таъкидлаш лозим, Кеббаль, Саймон ва Крассо – "гол+пас" тизимида жамоанинг энг сермаҳсул футболчилари ҳисобланади. "Лорьян" эса ҳимоячилар Монтассар Тальби (Тунис), Арсен Куасси (Буркина-Фасо), Дарлин Йонгва (Камерун), ярим ҳимоячи Артур Эбонг (Камерун) ва ҳужумчи Айегун Тосинни (Бенин) сафарга жўнатган. Уларнинг барчаси (5 нафар) Франция чемпионатида ўйин вақти бўйича ТОП-11га киради. 

Лиганинг яна бир неча жамоаси тўрт нафардан футболчисисиз қолди – "Лилль", "Ницца", "Анже", "Метц" ва "Гавр". ПСЖдан эса фақатгина икки футболчи Африкага йўл олган, худди "Монако" синграи (Камара билан Крепен Диатта Мали термаси сафига жалб этилган).

Англия чемпионати – АПЛни 33 футболчи тарк этди

Африка Кубоги дунёнинг энг кучли лигаси номиза давогарлик қилувчи чемпионатдан 30 нафардан кўпроқ футболчини Туманли Альбиондан олиб кетмоқда. Бундан ташқари Чемпионшипдан ҳам 11 футболчи "хизмат сафарига" йўл олган. Ҳаттоки Англиянинг учинчи дивизионидан ҳам (1 Лига) тўрт нафар футболчи юртига қайтади.

Номлар ҳақида гапирадиган бўлсак, асосий фигура – АПЛнинг ўтган мавсумдаги тўпурари Миср ва "Ливерпуль" жамоаси аъзоси Муҳаммад Салоҳ. "Transfermarkt" талқинига кўра, энг қиммат футболчилар камерунлик Брайан Мбемо "Манчестер Юнайтед" (€ 75 млн), мисрлик Омар Мармуш ("Манчестер Сити", € 65 млн), "Брайтон"дан яна бир камерунлик Карлос Балеба (€ 60 млн) ва "Манчестер Юнайтед"дан яна бир футболчи ивуарлик Амад Диалло (€ 50 млн).

Мусобақадан англияликлар орасида энг катта зарар кўрган – "Сандерленд". Мазкур клуб Африкага 6 нафар футболчисини қўйиб юборишга мажбур бўлди. Бундан ташқари "Манчестер Юнайтед" ва "Фулхэм"нинг ҳам таркибига сезиларли таъсир кўрсатди. Манчестерни вингерлар Мбемо (6 гол билан энг яхши тўпурар) ва Диаллодан ташқари, ҳимоячи Нуссайр Мазрауи ҳам тарк этган. "Фулхэм" уч нафар нигерияликлар хизматидан фойдалана олмайди – ҳимоячи Кэлвин Бейсси, вингерлар Алекс Ивоби ва Саму Чуквезе. Уларнинг охирги иккитаси жамоада энг сермаҳсул уч футболчи қаторига киради.

Туркия чемпионати – Суперлигадан 21 футболчи

Қанчалик ажабланарли кўринмасин, Африка Кубогидаги вакиллари сони бўйича ТОП-3ни Туркия чемпионати якунлаб берди. Туркия Суперлигасини мусобақа даврига 21 нафар футболчи тарк этди. Бундан ташқари Туркиянинг иккинчи дивизиони мазкур рўйхатга яна 6 нафар футболчи қўшилишига сабаб бўлди.

Рўйхатдаги энг қиммат футболчи, табиийки, "Галатасарой" ва Нигерия термаси етакчиси Виктор Осимхен. Ҳужумчи трансфери нархи 75 млн. евро деб баҳоланмоқда. Нархи ёмон бўлмаган яна бир қанча йигитлар бор: марокашлик Юссуф Эн-Несири (€ 24 млн) ва малилик Доржелес Нене (€ 17 млн) "Фенербахче", Мали термасининг бошқа бир вакили Эл Билол Туре (€ 15 млн) ва нигериялик Вильфред Ндиди (€ 12 млн) "Бешиктош"дан.

Африка миллатлар кубоги айниқса "Галатасарой" ва "Аланьяспор"га "кучли зарба" берди. Ҳар икки клубнинг 3 нафардан футболчиси қитъа мусобақасига йўл олган. Туркия чемпиони Осимхендан ташқари, сенегаллик ҳимоячи Исмоил Якобс ва габонлик ярим ҳимоячи Марио Лемина хизматидан фойдалана олмайди. "Аланьяспор" эса Маэстросисиз (Ангола) ҳамда ҳужумчилар Элиа Мешак (Конго ДР) ва Стива Мунье (Бенин)сиз қолди. Бу орада жамоага фақатгина Маэстро чинакамига йўқотиш эканлигини таъкидлаш лозим, ҳужум чизиғи вакиллари эса асосан захирадан ўйинни кучайтириш фигуралари ҳисобланади.

Италия чемпионати – А Сериядан 19 футболчи

Мазкур рўйхатнинг 4-ўринида – Италия чемпионати жойлашган. Аппенин ярим оролининг "йўқотишлари" Турк Суперлигасиники билан деярли бир хил. А Сериядан Марокашга 19 футболчи учиб кетган. Б Серия яна 4 нафар футболчини қўшиб қўйди.

Нарх борасида – "Аталанта" ҳужумчиси Адемола Лукманга тенг келадиган йўқ (€ 40 млн). Иккинчи ўринда "Рома" ҳимоячиси Эван Н’Дика (€ 30 млн). Шунингдек, ТОП-5га яна бир ивуарлик Одилон Коссуну ("Аталанта", € 25 млн), марокашлик Нейл Эл Айнауи ("Рома", € 20 млн) ва сенегаллик Булайе Диа ("Лацио", € 15 млн) кирди.

Алоҳида клублардаги вазият ҳақида гап кетса – "Лечче"га ачинмаймиз. Шундоқ ҳам захира ўриндиғи унчалик узун бўлмаган клуб 3 нафар футболчисидан айрилган – ҳимоячи Киалонда Гаспар (Ангола), ярим ҳимоячи Лассана Кулибали (Мали) ва вингер Ламек Банда (Замбия). Уларнинг ҳар бири – "Лечче" учун муҳим фигура ҳисобланади.

Германия чемпионати – Бундеслигадан 17 футболчи 

Мазкур рўйхатнинг бешинчи поғонаси Бундеслигага насиб қилди. Африка Кубоги дарагини эшитган 17 футболчи Германия элит лигасини тарк этган бўлса, иккинчи Бундеслигадан ҳам яна 2 футболчи клуб ихтиёрини тарк этди.

Уларнинг орасида энг қиммати – "Бавария" ва Сенегал термаси форварди Николас Жексон (€ 50 млн). "Байер" ва Буркина-Фасо термаси ҳимоячиси Эдмон Тапсобанинг ҳам нархи ёмон эмас (€ 35 млн), шу билан бирга "Вольфсбург" ҳамда Жазоир термаси аъзоси Муҳаммад Амур (€ 32 млн) кучли учликни якунлаб берди. Кейинги ўринларда – "Байер"нинг яна бир вакили Элисс Бен-Сегир ва "Штутгарт"дан Билол Эл-Ханнус (ҳар иккисининг нархи – 28 млн. евродан).

"Байер" мураббийликлар штаби вакилларига ҳавас қилиб бўлмайди. Леверкузен клуби Африка Кубогига йўл олган квартетисиз қолди. Германиянинг бошқа ҳеч бир клуби бундай вазиятга тушмади. Тапсоба ва Бен-Сегирдан ташқари "Байер" сафини жазоирлик ярим ҳимоячи Иброхим Маза ҳамда камерунлик ҳужумчи Кристиан Кофане тарк этишган. Ваҳоланки улар ҳам мунтазам ўйин амалиётига эга бўлаётган футболчилар сирасига киради.

Испания чемпионати – Ла Лигадан 16 футболчи

Европанинг топ чемпионатларини инобатга олсак, Африка Кубогидан энг кам зарар кўрган бу Примера. Бироқ Испания элит лигаси ҳам 16 футболчисидан айрилди. Қўшимчасига Сегундадан яна 4 футболчи.

Энг қиммати – 2024 йилдан бошлаб Марокаш термаси шарафини ҳимоя қилишга қарор қилган Браим Диас. 35 млн. еврога баҳоланаётган "Реал" вакили чемпионатнинг очилиш ўйинида гол уриб, жамоаси ғалабасига муносиб ҳисса қўша олди. Яна тўрт нафар футболчи 20 млн. евродан – бу Абде Эззалзули (Марокаш ва "Бетис"), Флавьен Бойомо (Камерун ва "Осасуна"), Карл Этта Эйонг (Камерун ва "Леванте") ҳамда Пап Гейе (Сенегал ва "Вильярреал").

Испанлар орасида энг кўп азият чеккан "Бетис" клуби ҳисобланади. Севилияликларнинг уч нафар футболчиси Африкага учиб кетди. Вингер Абде билан марокашлик ярим ҳимоячи Софьян Амрабат ва Конго Демократик Республикаси ҳужумчиси Седрик Бакамбу ҳам ўз термалари сафига йўл олишган. 

Бошқа чемпионатларда вазият бирмунча яхши. Португалия Примейрасидан 14 футболчи, қолганларда ундан ҳам камроқ. Алоҳида клублар миқёсида олсак, Кипрнинг "Арис" жамоасининг 4 футболчиси ҳам соврин учун курашади – ҳимоячилар Жедеон Калулу (Конго ДР), Стив Яго (Буркина-Фасо), Алекс Мукету-Муссунда (Габон) ва ярим ҳимоячи Ясин Буран (Комор ороллари). Чемпионлик учун курашаётган "Арис" учун анча қийин вазият юзага келган.