Ўйиндан кейин "БухДУ" бош мураббийи Азамат Шарипов матбуот анжуманида иштирок этди.
- Ўйин ҳақида фикрингиз?
- Ғалаба билан "Каттақўрғон"ни табриклайман. Баҳс тенг курашлар остида кечди. Ҳар икки жамоада вазиятлар бўлди. Биринчи таймда икки бор голли вазиятдан фойдалана олмадик. Дурангга мос ўйин бўлди. Тўп киритилган ҳолатда жарима зарбаси бор эди, йўқ эди, бошқа масала. Бу каби учрашувларда стандартлар кўп нарсани ҳал қилади. Жарима тўпидан гол ўтказиб мағлуб бўлдик. Футболчиларимиз қоида бузилмаганди дейишди.
- Бугун жамоангиз Суперлигага чиқишни мақсад қилган жамоага яхши қаршилик кўрсатди. "БухДУ" олдига қандай вазифа қўйилган?
- Мақсадимиз маҳаллий футболчиларни тарбиялаш. 2005-2006-2007 йилда туғилган футболчиларни тарбиялаб Суперлига жамоаларига бериш. Таркибимизда ўйин амалиёти кам бўлган, кўрикдан ўта олмаган футболчилар ҳам бор. Ҳозир шу футболчилар устида ишлаяпмиз. Тўғри ютқазяпмиз, лекин ҳеч ким кўрмайдиган катта ишни амалга оширяпмиз.
- Жамоангиз ўйинини илк бор стадионда кузатдим ва менга ўйин ёқди. Одатда кучли жамоаларга қарши меҳмонлар қарши ҳужум тактикасини танлайди. Лекин сиз тенгма-тенг ўйин кўрсатдингиз.
- Биз "Каттақўрғон" билан баҳсга алоҳида тайёргарлик кўргандик, мақсадимиз уларни юқорида кутиб олиш эди. Агар ҳимояда ўтириб уларга имкон берганимизда, рақиб бизни анча қийнаб қўйган бўларди. Чунки "Каттақўрғон" сафида индивидуал кучли футболчилар кўп. Уларга ҳужум бермаганимиз эвазига ўйинимиз чиройли кўринди. Ҳеч бўлмаса дурангга умид қилгандик.
- Аввалги баҳсларда легионерлар ўйин тақдирини ҳал қилиб "Каттақўрғон"га ёрдам беришганди. Лекин бугун легионерлар унчалик кўринмади. Уларни ёпиш борасида алоҳида ишланганмиди?
- Албатта, биз ҳар бир ўйиндан олдин рақибни ўрганиб чиқамиз ва шунга яраша ҳозирлик кўрамиз. Рақибнинг уч нафар ҳужумкор футболчиси кучли эканини билардик. Агар уларга қарши нимадир ўйлаб топмаганимизда бизга қийин бўларди. Тўп уларга тушмаслиги учун прессинг орқали ўйнадик.
- Бу йил Пролигада университетлар жамоаси кўпайди. Шундан келиб чиқиб "БухДУ" қанчалик университет жамоаси дея оласиз?
- Таркибимизнинг ярми талабалардан иборат. Ҳаммаси университетда таҳсил олади. Шу томонлама селекция қийинчилик туғдирмайди. Футболчиларнинг ўзи ўқиш учун келади. Бизда бош жамоа "Бухоро" бор ва U-21 жамоаси бор. Кейин биз бормиз. Ким қайси жамоада ўйнаса фойда бўлишини ҳал қилиб оламиз.
