Бугун футбол. "Обод" - "Қизилқум"

«Обод» (Тошкент) – «Қизилқум» (Навоий)
6 май 2017. Тошкент. "Жар" стадиони. 17:30
Ҳакамлар: Т. Тўхтасинов (Андижон), З. Абдураҳмонов (Андижон), А. Маражабов (Андижон), Ф. Норсафаров (Қарши).
Назоратчи: Р. Серазетдинов (Тошкент).
ЎзПФЛ вакили: Ф. Магаметов.

Ўйин олдидан: Бугун аввалги турда ғалаба қозонмаган жамоалар ўзаро баҳс олиб боришади. 8-турда "Локомотив"дан 0:7 ҳисобида мағлуб бўлган "Обод" ўз майдонида "Насаф" билан 1:1 ўйнаган "Қизилқум"ни қабул қилади.

Турнир жадвалидаги ўрни: Саккиз ўйинда атиги беш очко жамғарган "Обод" охирги ўринни эгаллаб турибди. Тўплар нисбати 4-14. "Қизилқум" эса 9 очко билан ўнинчи ўринда бормоқда.

Факт: Ўз майдонида учта ўйин ўтказган "Обод" ҳали ғалаба нашидасини сургани йўқ. Рауф Инилеев шогирдлари икки марта дуранг ўйнаб, бир бор ютқазиб қўйишган. "Обод" "Жар" стадионида "Қўқон-1912" ва "Бунёдкор" билан дуранг қайд этган, "Олмалиқ"қа 0:1 ҳисобида ютқазиб қўйган.

Биласизми? "Обод" ўз уйида ҳали ғалаба қозонмаган икки жамоадан бири. Яна бири - "Нефтчи". Қолаверса, "Обод" "Жар"даги ўйинларда атиги иккита гол урган.

Факт: "Қизилқум" бугун сафарда бешинчи ўйинини ўтказади. Жамоа аввалги тўртта учрашувнинг фақат биттасида ғолиб бўлган. "Қизилқум" сафарда кимсан "Бунёдкор"ни мағлуб этиб, "Қўқон-1912" ва "Пахтакор"дан мағлубиятга учраган, шунингдек, "Олмалиқ" билан 0:0 ўйнаган.

Эсингиздами? Ўтган йил "Жар" стадионида бўлиб ўтган беллашув 2:2 ҳисоби билан якун топган.