"Биз ўзбекистонлик футзалчиларни ҳурмат қиламиз" - Моҳаммад Наземошаҳриа

Бугун Ўзбекистон футзал терма жамоаси жаҳон чемпионатининг 1/8 финал учрашувини ўтказади. Литвада бўлиб ўтаётган мусобақанинг нимчорак финалида футзалчиларимиз Эрон футзал термасига қарши кураш олиб боришади. 

Албатта, бугунги ўйин жуда муҳим, қолаверса рақиб ҳам анча кучли. Эронлик футзалчиларнинг кучини ҳаммамиз яхши биламиз. 2016 йилги жаҳон чемпионатида Эрон учинчи ўринни қўлга киритганди. 

Бугунги баҳс олдидан эронликлар бош мураббийи Моҳаммад Наземошаҳриа шундай деди: 

- Биз гуруҳ учрашувларини муваффақиятли якунлаб 1/8 финалга чиққанимиздан хурсандмиз. Аргентинага қарши ўйинда икки нафар ўйинчимиз жароҳат сабаб ўйнай олишмади. Улар бўлажак ўйинга тайёр. 

- Ўзбекистон футзал терма жамоаси кучли, чунки жаҳон чемпионатида кучсиз жамоалар иштирок этмайди. Биз ҳеч бир рақибга паст назар билан қарамаймиз, ўзбекистонлик футзалчиларни ҳам ҳурмат қиламиз.

- Биз Ўзбекистонга қарши июль ойида Таиландда ўтказилган мусобақада баҳс олиб боргандик. Шундан бери орадан вақт ўтди ва рақиб анча кучайди. Ўзбекистон жаҳон чемпионатига жуда яхши тайёргарлик кўрди. Гуруҳ баҳсларида гарчи икки бор мағлубиятга учраган бўлса-да, бу ҳеч нарсани англатмайди. Негаки плей-оффда ҳар нарса рўй бериши мумкин. 

Эслатиб ўтамиз, Эрон футзал терма жамоаси ушбу жаҳон чемпионатида Сербия ва АҚШ устидан ғалаба қозониб, Аргентинага имкониятни бой берди ва иккинчи ўрин билан гуруҳдан чиқди. 

Баҳодир Аҳмедов бошчилигидаги футзалчиларимиз эса Гватемала билан Россияга имкониятни бой бериб, Мисрни мағлуб этган ҳолда кейинги босқич масаласини ҳал қилишди. Бугунги муҳим беллашув бизнинг вақт билан 19:30да старт олади.