Ўйиндан кейин "Жайхун" бош мураббийи Айбек Нурбаев матбуот анжуманида иштирок этди.
- Ўйин ҳақида фикрингиз?
- Авваламбор чиройли ўйин учун ҳар икки жамоага раҳмат. Бугун биз ҳам, рақиб ҳам ютиши мумкин эди. Томошабоп баҳс гувоҳи бўлдик. Бугунги ўйинда дўстлик ғалаба қозонди. "Шўртан" билан учрашувдан сўнг бизда кам вақт бўлди ва бу ўйинга яхши ҳозирлик кўра олмадик. Ўйинлар ораси қисқа, масофа узоқ. "Шўртан" билан ўйинни ўтказиб эртаси кун йўлга чиқдик. Шунинг учун яхши тайёргарлик бўлмади. Йигитларимизга ҳаракат қилишгани учун раҳмат. Тўғрисини айтсам, дурангдан хафа эмасмиз.
- Бутун ўйин давомида жамоангиз юқори прессинг қилди ва шу орқали рақибга босим ўтказди. Яъни, футболчилар толиқиб қолмади.
- Ҳар бир баҳсда ўзимизни кўрсатишга ҳаракат қиляпмиз. Менимча, эгаллаб турган ўрнимиз даражамизга мос эмас. Ҳар ўйинда яхши ҳаракат қиляпмиз, фақат натижалар доим ҳам яхши бўлмаяпти. Мавсум бошидаги тўрт-беш ўйинда ўзимизни кўрсата олмадик. Ҳаётимда йўқотиш бўлди, отамдан айрилиб қолдик. Бу ҳам таъсир қилди. Шундан сўнг яна ишга киришиб кетиб, болалар билан ишлай бошладим. Юқори прессингга келсак, биз машғулотларда бунинг устида ишлаяпмиз, ўзимга ҳам шу усул ёқади. Замонавий футбол шуни талаб қиляпти.
- Жамоангизнинг молиявий ҳолати қанақа?
- Биласиз, бу йилдан Қорақалпоғистон Миллий универстиети жамоамизни оталиққа олди. Университет раҳбарияти томонидан барча шароитлар қилиб берилмоқда. Уйдаги ўйинлардан бир кун олдин футболчиларимиз базада ётиб қоляпти. Овқатланиш, пуллик ишлар бўйича ҳам муаммо йўқ. Ўтган йилга нисбатан ўзгариш анча катта дея оламан. Бунинг учун университет раҳбариятига раҳмат айтиб қоламиз.
- Биринчи таймда жамоангиз қарши ҳужумларда ҳаракат қилди. Иккинчи таймдаги устунлик эса тўлиқ жамоангиз томонига ўтди.
- Аслида шу режа бўйича ўйнашни мақсад қилгандик. "Шўртан" билан баҳсни ўтказиб бўлгач бу ўйинга эътиборни қаратдик. Лекин айтиб ўтганимдек, кўнгилдагидек тайёргарлик кўра олмадик. Масалан, кеча айрим сабабларга кўра ўйиндан олдинги машғулотни ҳам қилмадик. Мен йигитларга биринчи таймда қарши ҳужумда ҳаракат қилишимизни айтдим. Иккинчи бўлимда эса рақибда чарчоқ бўлишини ҳисобга олиб тўлиқ ҳужумга ўтишни мақсад қилгандик. Фақат гол ура олмадик холос.
- "Ғазалкент" жамоаси ҳақида фикрингиз?
- Яхши ёш жамоа. Асосан 2007-2008-2009 йилларда туғилган футболчилар ўйнаяпти. Энг муҳими, бу ёшдагилар катта футбол ўйнаяпти. Зайниддин акага ҳам ҳурматим баланд, яхши жамоа шакллантиряпти. Менга "Ғазалкент" кўрсатган ўйин ёқди.
