"Андижон" янги аъзоси Абинур Нуримбет: "Келажакда Қозоғистон миллий терма жамоаси либосида майдонга тушишни истайман"

Футболчи ушбу янги чақирувни ижобий қабул қилди ва ўзини кўрсатишга тайёр. Клуб матбуот хизмати у билан интервью уюртирди ва бир қатор саволларга жавоб олди.

- Абинур, "Андижон" клубига хуш келибсиз. Ҳаммаси қандай содир бўлди?

- "Гомел"дан кейин уйим – Таразда бўлдим. Университетдаги ўқиш масаласи билан шуғулланаётгандим. Кейинчалик шартнома имзолаш имконияти билан "Андижон" йиғинларида қатнашиш таклифи келиб қолди.

- Бир неча кундан бери клубнинг ёзги йиғинида иштирок этяпсиз. Дастлабки таассуротларингиз қандай?

- Жамоадаги муҳит яхши, мени илиқ қабул қилишди, ҳаммаси зўр кетяпти.

- Сизни "Қозоғистоннинг Арда Гюлери" деб аташмоқда. Бу таққослаш сизга ёқадими?

- Гюлер билан таққослашлари ҳақида билмайман. Қолаверса, у чапақай, мен эса ўнгақайман.

- Бунгача "Андижон" жамоаси ҳақида нималарни билардингиз?

- Ўйинлар шарҳини кўрдим. Ҳар қалай, у ерда Белурусдаги собиқ жамоадошим Рустам тўп тепади. У менга мухлислар қаттиқ қўллаб-қувватлашини таъкидлаб ўтди. Чиндан ҳам ишқибозларнинг трибунадаги зўр қўллаб-қувватлашларини сездим.

- Дарвоқе, ўзингиз учун рақам танладингизми?

- Ҳозирча танлаганим йўқ.

- Олдин Беларусь чемпонатида Рустам Турдимуродов билан бирга ўйнагансиз. Энди у билан яна бир жамоадасиз. Буни кутганмидингиз?

- Агарда ростини айтсам, ҳаммаси бунчалик тез рўй беришини сира кутмагандим. Мавсум бошида бутун мавсумни "Гомел"да ўтказишни режалаштирган эдим.

- Ўз олдингизга қандай мақсад қўйдингиз?

- Ҳозир бутун диққат-эътиборим "Андижон" мақсадларига қаратилган, раҳбарлар, жамоа мураббийлари қўяётган мақсадларга эътибор қаратганман. Келажакда эса албатта Қозоғистон миллий терма жамоаси либосида майдонга тушишни истайман.