Антонелла футболчига Instagram тармоғидаги саҳифаси орқали мурожаат қилди.
"Ушбу босқични айнан шундай якунлаганингиздан нақадар фахрланаман. Шунча йиллар, шунча лаҳзалар, қанчадан-қанча қувонч ва албатта тақдирнинг қанча зарбалари... Қандай азоб чекканингизни, йиқилиб, яна оёққа турганингизни кўрдим. Нимадир ўхшамай қолганида олдинга интилишда давом этганингизни ва ҳар доим қайтадан уриниб кўрганингизни кўрдим. Ва шунча йиллардан сўнг сиз билан бирга орзуларингиз рўёбга чиқишини кўриш ва ҳаётимизнинг энг бахтли кунларини биргаликда кечириш менга насиб этди. Бироқ бу бутун тарихда мени энг кўп таъсирлантирган нарса — фарзандларимиз буларнинг барчасини яқиндан кузатиб улғайганлиги бўлди. Улар ўз отасининг ўзи истаган нарса учун курашганини, таслим бўлмаганини ва энг охиригача ишонишда давом этганини кўришди. Кейин эса ёнингизда бўлиб, қандай қилиб ҳамма нарсага эришганингизни ва Жаҳон кубогини бошингиз узра кўтарганингизни кўра олишди", – деб ёзди футболчининг рафиқаси.
Унинг сўзларига кўра, қачонлардир фарзандлари ўз отасининг тарихи қанчалик буюк эканини ҳақиқатан ҳам тушуниб етадилар.
"Бугун эса улар шунчаки ўз отаси билан фахрланишади. Мен ҳам сиз билан фахрланаман. Сизнинг босиб ўтган йўлингиз, барча енгиб ўтган қийинчиликларингиз ва энг муҳими, ушбу ҳар бир лаҳза ортида турган шахсиятингиз билан фахрланаман. Буларнинг барчасини сиз билан бирга бошдан кечириш — қандай бахт! Биз сизни чексиз севамиз", – дея сўзини якунлади у.
Аввалроқ Месси Аргентина терма жамоасидаги фаолиятини якунлаганини эълон қилган эди.
