Ўйинда жамоанинг биринчи голи Абдусалом Нуриддинов томонидан урилди. Пролигада дебют қилган футболчи бекободликларга қарши беллашувдан кейин фикрларини билдирди.
— Дастлаб "Металлург" билан бўлган ўйин ҳақидаги таассуротларингиз билан ўртоқлашсангиз. Сизнингча, бу натижа сенсация бўлдими?
— Ассалому алайкум. Ўйин ҳақида гапирадиган бўлсам, буни сенсация демаган бўлардим. Чунки биз бу баҳсга олдиндан жиддий тайёргарлик кўрган эдик. Машғулотлар давомида мураббийимиз томонидан берилган кўрсатма ва тактикалар устида қунт билан ишладик. Майдонда эса ана шу меҳнатларимизни қўллай олдик ва бу ўз самарасини берди.
— Қандай ўйлайсиз, "Металлург" "Жайхун"га етарлича баҳо бермадими ёки майдонда "Жайхун" ҳақиқатдан ҳам кучлироқ кўриндими?
— Тўғри, "Металлург" таркибида тажрибали ва ёши катта футболчилар кўп, улар кучли жамоа ҳисобланади. Бироқ биз ёшлик шижоати эвазига кўпроқ ҳаракат қилдик ва кўп югурдик. Менимча, ҳар бир футболчи ўз позициясида сидқидилдан ҳаракат қилгани учун ҳам ижобий натижага эришдик.
— Охирги иккита ўйинда "Жайхун" ўзига кела олди ва "уйғонди". Дастлабки турларда жамоага нима етишмаган эди?
— Ўтган ўйинларни таҳлил қилсак, бизга бироз омад етишмади, холос. Вазиятлар бўлди, лекин улардан фойдалана олмаган эдик. Сўнгги учта учрашувда мана шу камчиликлар устида ишлаб, вазиятни ўнгладик. Худо хоҳласа, бундан буён ҳам шу руҳда давом этиб, мухлисларимизни ва Қорақалпоғистон халқини хурсанд қилишда давом этамиз.
— Бу йил фаолиятингизда янги саҳифа очиляпти десак бўладими?
— Албатта, бу йил фаолиятимда катта янгилик бўлди. Охирги уч йил давомида Биринчи лигада тўп тепган бўлсам, мана бу йил Пролигада дебют қиляпман. Насиб қилса, жорий мавсумда яхши натижалар кўрсатиб, келаси йили Суперлига жамоалари сафида ўйнашга ҳаракат қиламан.
