46 ёшли бразилиялик 15 ноябрь куни Италия С Серияси доирасидаги "Форли"га қарши ўз майдонида ўтадиган баҳсда "Равенна"нинг асосий таркибида ўйинни бошлайди. Ушбу маълумотни жамоа бош мураббийи Андреа Мандорлини тасдиқлади.
"У аниқ асосий таркибда майдонга тушади, бунга ҳеч қандай шубҳа йўқ. Шундан сўнг майдонда қанча вақт ўтказишини биргаликда ҳал қиламиз. У замонавий даврнинг энг буюк футболчиларидан биридир. Аммо биз натижага эришишимиз шарт. Биз доимо уч нафар ҳужумчи билан ўйнаймиз ва улардан бири айнан у бўлади", — деди Мандорлини.
Роналдиньо Италияга 13 ноябрь куни етиб келган ва учрашув олдидан жамоадошлари билан бор-йўғи битта машғулот ўтказади. Шунингдек, унинг жамоадоши Симоне Рабби пенальти белгиланган тақдирда зарбани бразилиялик футболчи амалга оширишини маълум қилди.
2026 йилнинг ёзида Роналдиньо Италиянинг учинчи дивизионида иштирок этувчи "Равенна" билан шартнома имзолаган ва клуб улушини сотиб олганди. Бироқ сўнгги паллагача "Олтин тўп" соҳибининг майдонга тушиш-тушмаслиги номаълумлигича қолаётган эди.
Маълумот ўрнида, Роналдиньо сўнгги расмий ўйинини 2015 йилнинг 27 сентябрь куни ўтказган. Ўшанда у Бразилия чемпионати доирасидаги "Гойяс"га қарши учрашувда (2:0) "Флуминенсе" сафида биринчи бўлимни ўтказиб, танаффусда алмаштирилган. Эслатиб ўтамиз, Роналдиньо 2002 йилги жаҳон чемпиони, 2005 йилги "Олтин тўп" соҳиби ҳамда "Барселона" таркибида 2005/06 йилги мавсум ЧЛ ғолиби ҳисобланади.
