Zoir To'raqulov: “Mana shu o'yin holatimizni yo'qotmasak, hammasi ijobiy hal bo'ladi”

-Bugun, garchi jamoamiz mag'lubiyatga uchragan bo'lsa-da, shogirdlarimga rahmat aytaman. Hammasi o'yin oldidan berilgan ko'rsatmalarni bajarishdi. To'g'ri, futbolda natija muhim. Lekin qo'lga kiritiladigan natija avvalo o'yin sifati va mazmuniga bog'liq. Bugun yutqazdik, lekin mana shu o'yin holatimizni yo'qotmasak, ertaga ishonchim komil biz albatta, ijobiy natijaga erishamiz.

-Ketma-ket muvaffaqiyatsizlik girdobidan yigitlarni qanday olib chiqish rejasi bor?
-Bosh murabbiy sifatida men, klub rahbariyati avvalo yigitlarning o'ziga ishonamiz. Ayni paytda tarkibimizda to'p surayotgan bir qator yoshlar bilan birga, Asror Aliqulov, Yaroslav Krushelnickiy, Jamol Otaqulov, Aziz Alijonov, Pavel Solomin, Andrey Vlasichev kabi tajribali futbolchilar bor. Bu yigitlar futbolda birinchi kun emas. SHunday ekan ularning tajribasiga suyangan holda qolgan uchrashuvlarda eng maksimal ochkolarni to'play olamiz. Qolaversa uy o'yinlarimizda fidoyi muxlislarimiz daldasiga ham katta umid bilan qarayapmiz.

-“SHo'rtan”ning xavfli “hududdan” chiqib ketishiga qanchalik darajada ishonasiz?
-Har bir inson ertangi kunga umid bilan yashaydi. Men esa bosh murabbiy sifatida yigitlarimizning salohiyatiga, imkoniyatiga ishonaman. “SHo'rtan” oliy ligaga munosib jamoa, demak har qanday holatda ham elitada o'z o'rnimizni saqlab qolish uchun eng maksimal darajada bor kuchimiz bilan harakat qilamiz.

-Hozir milliy terma jamoamizning JCH-2014 saralash turniri “pley-off” bosqichidagi ishtiroki munosabati bilan qisqa tanaffus yuzaga keldi. Jamoaning keyingi uchrashuvlariga tayyorgarligi qanday kechadi?
-Bayram munosabati bilan futbolchilarga biroz dam beriladi. 3 sentyabr kuni G'uzordagi qarorgohimizda yig'ilamiz va tayyorgarligimizni davom ettiramiz.