Yangicha ofsayd qoidasi Jahon chempionatigacha tasdiqlanishi va amaliyotga tatbiq qilinishi mumkin

"Arsenal" sobiq bosh murabbiyi, hozirda FIFAning futbolni global rivojlantirish bo'limi rahbari lavozimida ishlayotgan Arsen Venger quyidagi o'zgarishni taklif etgan edi: agar gol urish mumkin bo'lgan tana qismlaridan biri (istalgan qismi) oxirgi himoyachi bilan bir chiziqda yoki uning orqasida bo'lsa, garchi qolgan qismlari bu chiziqdan tashqarida bo'lsa ham, o'yinchi ofsaydda hisoblanmaydi. O'yindan tashqari holat faqat o'yinchining butun tanasi raqib darvozasi chizig'iga to'p va raqibning oxirgi himoyachisiga nisbatan yaqinroq bo'lgandagina qayd etiladi.

Ispaniyalik sobiq hakam va Cadena SER nashrining hakamlik bo'yicha eksperti Eduardo Iturralde Gonsalesning aytishicha, Venger nomidagi bu tuzatish noyabr oyida tahlil qilinadi va futbol qoidalarini tartibga soluvchi Xalqaro futbol associaciyalari kengashi (IFAB) tomonidan maqullanish ehtimoli yuqori.

IFAB azolari (23 nafar o'yinchi va 11 nafar hakam) tomonidan ko'rib chiqilgandan so'ng, qoidani o'zgartirish masalasi tasdiqlash uchun ovozga qo'yiladi. Ovoz berish 1 mart kuni bo'lib o'tishi kutilmoqda.

Iturraldening takidlashicha, agar qoida tasdiqlansa, u 2026 yilda kuchga kiradi - ehtimol, AQSH, Kanada va Meksikada o'tkaziladigan jahon chempionatidan boshlab tadbiq etiladi.