Vali Sultonov: “Orol” jamoasi ustidan g'alaba qozonganimizdan xursandmiz"

Jumladan, Urganch shahrining “Xorazm” jamoasi safarda “Orol” jamoasi bilan kuch sinashdi. Bu o'yin urganchlik futbolchilarning 1:0 hisobidagi g'alabasi bilan nihoyasiga etdi. Uchrashuv tugagach, mehmonlar jamoasi bosh murabbiyi Vali Sultonovning fikr-mulohazalari bilan qiziqdik.

- Qo'shni hudud, yani Qoraqalpog'iston Respublikasi va Xorazm viloyatining bosh jamoalari o'rtasidagi bellashuv azal-azaldan murosasiz o'tishi bilan malum, - deydi V. Sultonov. – Hoh Nukusda, hoh Urganchda bo'lsin mazkur jamoalarning o'zaro bahsi o'ziga xos derbiga qiyoslanadi. Bu hol jamoalarimiz o'rtasidagi o'yinning doimo hujumkor va keskin o'tishi bilan isbotini topadi. Mavsum boshida o'z maydonimizda nukuslik futbolchilarni 2:0 hisobida mag'lubiyatga uchratgandik. SHu jihatdan, safardagi uchrashuvimizda mezbonlar revansh olishga intilishini bilardik. SHularni hisobga olib, tayyorgarlik ko'rgandik. Say-harakatlarimiz besamar qolmadi. Joriy yilgi mavsumdagi ikkinchi uchrashuvda ham qo'limiz baland keldi. Bundan xursandmiz, albatta. Umuman, “Orol” bilan kechadigan mazkur o'yinni sariq kartochkalari tufayli asosiy darvozabonimiz G'ayrat O'daev o'tkazib yuborishi lozim edi. Bu bizga muammo tug'dirardi. SHu kuni uni o'rnini zaxira darvozabonimiz Ravshan Jumaniyozov egalladi. U hali yosh bo'lishiga qaramay, ishonchimizni oqladi. Umuman, barcha futbolchilarimiz o'zlariga topshirilgan vazifani munosib uddalashdi. Buning uchun ularga minnatdorchilik bildiraman. Qolaversa, uzoq yo'l bosib Nukusga kelib “Xorazm” jamoasini qo'llab-quvvatlagan ko'p sonli muxlislarimizga ham rahmat aytaman va ularni jamoamizning navbatdagi yutug'i bilan tabriklayman.

Ikrom  XUDOYBERGANOV.