Ulug'bek Baqoev: "Iordaniyadan o'tish uchun bor kuchni ishga solamiz"

3 sentbyardagi mashg'ulotlar kechki payt “Jar” stadionida o'tkazildi. Bir yarim soat davom etgan mashg'ulotdan so'ng bizda Ulug'bek Baqoev bilan suhbat qilish fikri tug'ildi. Nega aynan Baqoevligini intervyuni o'qigach bilib olishingiz mumkin.
 
-   Ulug'bek aka, Iordaniya bilan o'yinga tayyorgarlik qanday ketyapti?
-   1 sentyabr kuni Qozog'iston chempionatida o'yinimiz bo'ldi. O'yinni o'tkazgach, ertasi kuni Toshkentga keldim. Bugundan esa terma jamoa mashg'ulotlariga kirishdim. Bo'lajak bahsga tayyorgarlik yaxshi ketyapti. Hammaning kayfiyati yuqori va hammaning miyasida bir fikr mavjud: nima qilib bo'lsa-da Iordaniya to'sig'idan o'tish.

-   Muxlislarimiz ikki o'yin natijasiga ko'ra Iordaniyani mag'lub etishimizga shubha qilishmayapti. Lekin keyingi bosqichda Janubiy Amerika vakili bilan to'p surish...
-   Keling, oldinlab ketmaylik. Avval Iordaniya masalasini hal qilaylik, undan keyin nima bo'lishini vaqt ko'rsatadi.

-   Hozirgi Iordaniya haqida qanday fikrdasiz?
-   Ular ham. Biz ham guruhda uchinchi o'rinni egalladik. Albatta, bizda birinchi yo ikkinchi o'rin bilan to'g'ridan to'g'ri jahon chempionatiga borish imkoniyati bor edi. Ammo so'nggi turda Janubiy Koreyaning kutilmaganda o'z uyida Eronga imkoniyatni boy berishi hammasini chippakka chiqardi. Iordaniya – jiddiy raqib va ulardan o'tish oson bo'lmaydi.

-   2011 yilgi Osiyo chempionatida aynan sizning ikki golingiz Iordaniyaga qarshi o'yinda terma jamoa uchun yarim final eshigini ochgandi. Bu o'yin hozircha Iordaniyaga qarshi oxirgi rasmiy bahsimiz bo'lib turibdi.
-   Bunday o'yinlarni unutib bo'larkanmi. Albatta, o'sha bellashuv va ikkita golim kechagidek esimda. O'shanda 2-raqamda maydonga tushgandim. O'shanda ham iordaniyaliklar bizga jiddiy qarshilik ko'rsatishgandi. Bu safargi to'qnashuvning ham oson kechmasligi aniq.

-   Asosiy tarkibda maydonga tushishga tayyormisiz?
-   Buni bosh murabbiy hal qiladi. O'zimga qolsa har doim asosiy tarkibda to'p surishga tayyor turganman.

Xayrulla XOLIQOV suhbatlashdi.