Transfermarkt va Championat.asia o'tgan oyning eng yaxshilarini aniqlashdi

Ovoz berishda Championat.asia xodimlari, Transfermarkt'ning rus bo'limi va mehmon ekspert – O'zbekiston terma jamoasi sobiq futbolchisi, hozirda O'zbekiston Futbolchilar uyushmasi raisi Kamoliddin Murzoev ishtirok etdi. 

So'rovnomaga ko'ra "Andijon" forvardi Rustam Turdimurodov Superliganing iyun oyidagi eng yaxshi futbolchisi deb topildi. U "Qizilqum" bilan o'yinda (3:3) dubl qayd etgan bo'lsa, "Navbahor" bilan uchrashuvda bitta to'p kiritdi. Alohida aytish joiz, oyning eng yaxshi futbolchisi bo'lish uchun kurash qizg'in kechdi: Turdimurodov "Neftchi" hujumchisi Husayn Norchaevdan 4 foiz ko'proq, yani umumiy 24 foiz ovoz oldi.

Superliganing iyun oyidagi eng yaxshi murabbiyi sifatida Ivan Boshkovich tan olindi. "So'g'diyona" uning qo'l ostidagi uchta uchrashuvning hammasida g'alabaga erishdi. Birinchi davradan so'ng chernogoriyalik mutaxassis jamoasi Superligada peshqadamdan atigi 3 ochko ortda qolgan holda uchinchi o'rinda bormoqda. Boshkovich 38 foiz, uning eng yaqin taqibchisi, "Andijon" bosh murabbiyi Aleksandr Xomyakov 24 foiz ovozga ega bo'ldi.