Toshkentda FIFA Grassroots dasturi bo'yicha xalqaro kurslar boshlandi. Uni Usmon Toshev olib bormoqda

FIFA Grassroots dasturi maktab, jamoat va klublar tashabbusi orqali 6-12 yoshdagi o'g'il-qizlarga qaratilgan bo'lib, dasturning asosiy maqsadi – futbol o'yini orqali imkon qadar ko'proq odamlarni, hususan yoshlarni birlashtirishdir.

Dastur maxsus infratuzilma talablarisiz futbol o'ynash imkoniyatini yaratadi. SHu sababli hech qanday intensiv mashg'ulotlar yoki murakkab taktikalarga murojaat etilmaydi.

Grassroots dasturi barcha futbol associaciyalari bilan yaqin hamkorlikda tuzilgan va insoniy qadriyatlarni almashinuvini qo'llab-quvvatlaydi.

Mazkur o'quv kurslarga Respublikamizning barcha hududlaridan kelgan murabbiylikka qiziqishi bor 30 nafar mutaxassis jalb etilgan.

O'quv kurslar FIFA va OFK instruktori Usmon Toshev tomonidan olib borilmoqda va unga Baxrom Umarov ko'maklashmoqda. O'quv-mashg'ulotlar koordinatori – Umid Xatamov.

15 yanvar kuniga qadar davom etadigan o'quv jarayoni yakunida bolalar futboli va ommaviy futbol bo'yicha festival o'tkazilishi rejalashtirilgan. Kurs so'nggida barcha ishtirokchilarga sertifikatlar topshiriladi.