Timur Kapadze kechagi konferenciya bo'yicha taassurotlari bilan o'rtoqlashdi

Ushbu tadbirda ikki nafar rossiyalik mutaxassis, shuningdek o'zimizdan bir qator futbol faxriylari, murabbiylar, OAV xodimlari hamda futbol kishilari ishtirok etishdi. Biz tadbirda qatnashganlardan biri "Lokomotiv" sardori Timur Kapadze bilan bog'lanib, bir nechta savolga javob oldik. 

- Kecha bo'lib o'tgan konferenciyada siz ham ishtirok etdingiz. Bundan qanday xabar topdingiz? 
- Konferenciya bo'lib o'tishidan bir kun oldin xabardor bo'ldim. "Lokomotiv" murabbiylar shtabiga yaqinda kelib qo'shilgan Andrey Fyodorov bir kun oldin men bilan jamoamiz bosh murabbiyi Andrey Miklyaevga Rossiyadan futbol mutaxassislari kelgani hamda futbol haqida maruza qilishlari, bu tadbirga bizlar ham taklif qilinganimizni aytdi. SHunda men konferenciya mavzusi bilan qiziqdim. Fyodorov mavzu asosan futbol to'g'risida bo'lishi, futbolni rivojlantirish uchun nimalar qilish kerakligi, shuningdek bolalar futboli haqida ham gaplar aytiladi degandan keyin ishtirok etish men uchun ham qiziq tuyuldi. 

- Taassurotlar qanday? 
- Endi taassurotlarga keladigan bo'lsam, Rossiyadan kelgan mutaxassislarni eshitdik, qolaversa o'zimizning futbol faxriylarimiz, murabbiylar, OAV xodimlari va futbolga aloqador kishilar bilan uchrashdik. Umumuan olganda, yaxshi taasurot qoldi. Menga shuningdek, Mirzahakim aka To'xtamirzaevning o'zbek sporti borasidagi maruzasi maqul keldi. To'g'ri, o'zbek futbolida muammolar ko'p, ammo Mirabror Usmonov rahbarligida futbolimiz yangi bosqichga chiqdi deb bemalol ayta olaman. Buni esdan chiqarish kerak emas. Oldinlari ko'p joylarda stadionlar bir ahvolda edi, qolaversa bolalar futboliga ham katta etibor qaratilmasdi. Lekin oxirgi yillarda ko'p stadionlar qayta tamirlanib, bazi joylarda yangitdan qurilib foydalanishga topshirildi. SHuningdek, bolalar futboliga bo'lgan etibor kuchaydi. 

- Anhor.uz saytida bir qator futbol faxriylari O'zbekiston Respublikasi Prezidenti SH.Mirziyoevga rezolyuciya (qaror) jo'natgani haqida xabar chiqdi. Va ro'yxatdagilar orasida siz ham borsiz. Bu haqda nima deya olasiz?
- To'g'risini aytsam, men qo'ygan imzo tadbirning boshida bo'ldi va uning rezolyuciya (qaror) ekanligini bilmagan holda bizning murabbiylar imzo chekayotganda men ham qo'l qo'ydim. Men bu nima qog'oz deb so'raganimda, shu konferenciyada ishtirok etganingiz uchun degan javobni oldim. Bor gap shu. 

X.Xoliqov suhbatlashdi.