"SQB Futzal Club" taqdimot brifingi bo'lib o'tdi

Jamoa O'zbekiston futzal federaciyasi shafeligida o' tkaziladigan mamlakat chempionati, kubogi va qolgan barcha musobaqalarda muvaffaqiyatli ishtirok etish, malum yutuqlarga erishish hamda terma jamoalarga mahoratli, tajribali futzalchilar etkazib berishni o'z oldiga ustuvor maqsad qilib olgan.

Kuni-kecha, Toshkentdagi "O'zsanoatqurilishbank" ATB bosh ofisida "SQB Futzal Club" jamoasi taqdimot brifingi bo'lib o'tdi.

Dastlab so'zga chiqqan klub direktori Anvarjon Achilov shunday dedi: "O'zsanoatqurilishbank" sog'lom turmush tarzini yurtimiz bo'ylab targ'ib qilishni, jumladan, futzal sport turiga yoshlarni jalb etishni maqsad qilgan. Bank tashkil etilgan futzal klubi yuqori darajada faoliyat olib borishi uchun barcha zarur shart-sharoitlarni yaratib berishga tayyor. Kelajakda klubni xususiylashtirish borasida ish olib boramiz. Professional maqomga ega bo'lgan jamoamiz nafaqat ichki chempionatimizda balki xalqaro maydonda ham yurtimiz sharafini munosib himoya qilishiga ishonaman. Shunga moslab tarkib shakllantiryapmiz. Shuning uchun Ravshan Eliboev, Akbar Usmonov, Dilmurod Shavkatov kabi tajribali futzalchilarni tarkibimizga qo'shib oldik. Bundan tashqari, kuchli legionerlarni qo'shib olish ustida ish ham olib boryapmiz".

Jamoa bosh murabbiyi Konstantin Sviridov ham jamoa faqat yuqori o'rinlar uchun kurashishini takidladi: "Jamoa 15 yildan buyon havaskorlar ichida turli musobaqalarda ishtirok etib keladi va mustahkam poydevorga ega. Endi esa yana bir maqsadimiz amalga oshdi –jamoa professional klub maqomini oldi. Professionallar ichida ham eng yuqori o'rinlar uchun kurashishni niyat qilganmiz. Albatta, bu maqsad yo'lida astoydil harakat qilamiz. Dastlab kubok bahslari orqali jamoaning bugungi holatini yanada yaxshiroq ko'rib, bilib olamiz. Tarkibdagi tajribali sportchilarimiz bilan yosh iqtirdorlarni birlashtirib, maqsadimizga erishishga harakat qilamiz".