Sergey Lushchan: “Bugun ular o'z jamoasi uchun emas, raqib uchun o'ynashdi. "Navbahor"da ishlar ekanman, bu o'yinchilar endi tarkibdan joy olmaydi”

"Raqib jamoani g'alaba bilan tabriklayman. Muxlislarimiz oldida esa bu o'yin uchun chin dildan uzr so'ramoqchiman. Barcha ayb o'zimda. Men o'yin uchun tarkibni va taktikani noto'g'ri tanladim.

Ayniqsa, tarkib masalasida. Reja boshqacha edi. Har holda, bu muvaffaqiyatsizlik uchun uzr so'rayman. Bundan keyin nima bo'lishini ko'ramiz. Besh o'yindan buyon ayrim futbolchilar maydonda umuamn ko'rinmayapti. Bugun ular o'z jamoasi uchun emas, raqib uchun o'ynashdi.

Bu erda ishlar ekanman, bu o'yinchilar endi tarkibdan joy olmaydi" - dedi Sergey Lushchan bugungi bahs haqida.

- Bugun tarkibni to'g'ri tanlay olmadim dedingiz. Agar hisob qanday bo'lishini bilganingizda, qanday tarkib tanlagan bo'lardingiz? Aynan qaysi futbolchilarni maydonga tushirganingizdan afsusdasiz?

-  Menda o'z malumotlarim va tushuncham bor. Odamlarga ishonch bildirgan edim, hayot shuni ko'rsatadiki, har kimga ham ishonib bo'lmaydi. Bu sport. O'zim ham bundan bir necha bor jabr ko'rganman, bugun ham shunday bo'ldi.

Sportda raqobat bor. O'yinchining familiyasi yoki qiymati muhim emas. 2-3 ta o'yinda sen kutilgan natijani ko'rsatmasang, bu o'yinchi maydonda bo'lmasligi kerak.

- Mag'lubiyatning asosiy sababi nima deb o'ylaysiz? 

-  Birinchidan, o'yinni raqib jamoaga moslab qayta qurish kerak edi. Tajribali futbolchilarni maydonning markaziga joylashtirish va asosiy etiborni ikkinchi bo'limga qaratish lozim edi. Bilamizki, raqibimiz ikkinchi bo'limda ham kuchliroq o'ynaydi.

- Futbolda bir o'yinda har narsa bo'lishi mumkin. Hatto Evropa top klublari ham bazan yirik hisobda yutqazishadi, lekin bu bir o'yin, va keyin hammasi unutiladi. Bugun “Navbahor”da shunday omadsiz o'yin bo'ldimi yoki raqib jamoangizdan to'liq ustun keldimi?

- Bugun himoya umuman yo'q edi. Bizda Mirsaidov, Ahmedov, G'ofurov o'ynadi. Qolganlari yo'q edi. Raqib hujumining so'nggi bosqichini bartaraf etishda ishtirok etishi kerak bo'lgan futbolchilar shunchaki yo'qolib qolishdi.

Endi rahbariyat bugungi mag'lubiyatdan so'ng bir qarorga kelishi kerak. Aslida shunday ham bo'lishi kerak.

- Tezkor gol o'yin natijasiga qanchalik tasir o'tkazdi?

-  Agar etibor bergan bo'lsangiz, biz uchinchi o'yinki dastlabki daqiqalarda gol o'tkazib yuborayapmiz. Buning sababini bilmayman. Aytmoqchimanki, bu erda bizning asosiy muammomiz - himoyada o'ynash va himoyadan chiqish. Yigitlarga ikki hafta dam berilgandan keyin ularga nima bo'lganini bilmayman. Mashg'ulot jarayonida hammasi joyida. Maydonda esa hamma yo'qolib qoladi.

Hozir his-tuyg'ularim tasirida ortiqcha gap aytib qo'yishdan qo'rqaman. Kimgadir chuqurroq tushuntirish kerakdir, albatta, lekin avval vaziyatni o'rganib chiqish, mashg'ulot jarayonidagi muammolarimizni aniqlash lozim. Aytgancha, men faqat mashg'ulot jarayoni haqida gapirayotganim yo'q, bizda ko'p narsa joyida emas.

O'yinda nima bo'layotganini tushunish juda muhim. Bu juda qiyin. Ehtimol, kimgadir nimadir etishmayotgandir, men esa bu vaziyatni sinchiklab o'rganib chiqaman. Chunki futbolchilarning tushkunlikka tushmasdan o'ynayotgani aniq ko'rinib turibdi. Nima bo'layotganini tahlil qilish va vaziyatni qanday yaxshilash mumkinligini xotirjam o'ylab ko'rish kerak.

-  Lyupcho Dorievning bugungi o'yinini ko'rdingiz. Dorievning Superliganing eng yaxshi futbolchisi degan fikrga qo'shilasizmi? 

-  Yo'q. Bizda juda ko'p yaxshi futbolchilar bor. Har bir jamoada 2-3 nafar futbolchi bor, ular haqiqatan ham Evropa va jahon futboli darajasiga mos keladi. Yani futbolimiz va chempionatlarimiz darajasi juda yuqori. Buni tan olish kerak. Dorievga kelsak, u o'tgan yili shunday o'ynadi. U paytda jamoa yanada quvnoqroq edi. Yovovich ham tarkibda edi. 

-  Bugun o'yindan oldin bazi jurnalistlar bugungi o'yin natijasi ikki jamoa murabbiylarining kelajagini aniqlab beradi deya yozishgan edi. Siz hozir rahbariyat bir qarorga keladi dedingiz. Jamoadagi kelajagingizni nazarda tutdingizmi yoki tarkibdagi o'zgarishlarni?

-  Yo'q, men hech narsaga ishora qilayotganim yo'q, shunchaki ishlarning qanday yo'lga qo'yilganini bilib olyapman, xolos. Uch hil murabbiy bor, ishlayotgan ishsiz va yaqinda bo'shatilgan. Bu bizning ishimiz va qismatimz. Bu erdagi barcha qarorlarni rahbariyat qabul qilishi kerak.

Agar ular bizni ideal emas deb hisoblashsa, bunday o'yinlardan keyin esa, nafaqat rahbariyat, balki muxlislar ham norozi bo'lishadi. Birinchi davradan keyin ikkinchi o'rinda bo'lishi mumkin bo'lgan jamoaning hozirgi ahvoli yaxshi emas. Ketma-ket uchinchi o'yinda nima bo'layotganini bilmayapmiz. Futbolchilarga nima bo'layotganini tushuna olmayapmiz.

Mashg'ulotlarda hamma narsa mukammal. Yakuniy qarorni rahbariyat qabul qiladi. Agar biror nomzod bo'lsa, men minnatdor bo'laman. Bu erda menga juda yoqdi, barcha sharoitlar va rahbariyatning bizga bo'lgan munosabati yaxshi bo'ldi.

Bunday o'yinlardan so'ng jiddiy o'zgarishlar qilish kerak. Murabbiy kim ekanligining farqi yo'q, Trappatoni-mi yoki Lushchan. Gvardiola ham ketma-ket uchta bahsda mag'lub bo'lsa, uni ham ishdan bo'shatishadi.

Afsuski, jamoa bilan nima ro'y berayotganini bila olmayapman. Agar nima bo'layotganini bilganimda, bunchalik afsuslanmasdim.