Sarvar Karimov: Jahon chempionatida oddiy raqiblar bo'lmaydi

- Sarvar, qura tashlash marosimidan keyin, guruhimizdagi raqiblar haqida qanday fikrdasiz?
- Quradan ko'nglim to'ldi va bizga bu borada omad kulib boqdi desa ham bo'ladi. To'g'ri, Xorvatiya, Marokash va Panama o'smirlar terma jamoalarini ham kuchsiz deb bo'lmaydi. O'ziga yarasha taktika va o'yin uslubiga ega jamoalardir. Umuman olganda, jahon chempionatida oddiy raqiblar bo'lmaydi. Qolaversa bunday yoshdagi terma jamoalarning birortasini kuchli yoki aksincha deyish ham noo'rin.

- SHaxsan siz uchun O'zbekiston o'smirlar terma jamoasi o'rin olgan S guruxida, ko'proq qaysi jamoa xavfli ko'rinmoqda?
- Ochig'i, raqiblarimiz haqida bugungi kunda to'la malumotga ega emasmiz. Menimcha har bir raqibni hurmat qilish kerak.

- Guruhdan keyingi bosqichga chiqish imkoniyatimizni qanday baholaysiz?  
- Guruhdan chiqish uchun astoydil kurashamiz. Buning uchun ayni paytda puxta tayyorgarlik ko'ryapmiz. Har bir raqib bilan o'ynasa bo'ladi. SHuning uchun maqsadimiz jahon chempioni bo'lish!

- JCHda qaysi terma jamoalar bilan ro'baro' kelishni xohlardingiz?
- Guruhda kuchli va nomdor bo'lgan raqiblar bilan to'qnash kelishni istagandim. Braziliya, Argentina... shu kabi kuchli terma jamoalarga qarshi o'ynashni niyat qilgandim. Umid qilamanki, ularning barchasi bilan jahon chempionatida o'ynashga ulguramiz.


Islombek Rustambekov suhbatlashdi.