Rustam Xojaev: "Osiyo kubogi mezbonligi Markaziy Osiyo futboli rivoji uchun juda katta turtki bo'ladi"

"Xo'jand" jamoasi mazkur yig'in doirasida "Oqtepa", "Aral", "Surxon" bilan nazorat uchrashuvlarida ishtirok etdi. Saytimiz jurnalisti Abdulaziz Iskandarov qo'shnilarimizning yangi mavsumga tayyorgarligi xususida "Xo'jand" bosh murabbiyi Rustam Xodjaevga yuzlandi.

- Rustam Nazrievich Toshkentdagi yig'in ko'ngildagidek kechdimi? 

- Yangi mavsumga tayyorgarlikni yanvar oyida boshladik. Dastlabki bosqichlarni o'z qarorgohimizda olib borgan bo'lsak, keyingi mashg'ulotlar Toshkentda suniy maydonlariga ko'chdi. Ilk turni "Istiqlol"ga qarshi o'tkazamiz. Bu borada poytaxt yig'ini ayni muddao edi. Hammasi ko'ngildagidek ketmoqda. Muhimi chempionatga munosib tayyorgarlik ko'rish. 

- "Xo'jand" doim sovrindorlar qatorida bo'ladi. Yangi mavsumda maqsadlar qanday?

- "Xo'jand" Tojikistonning etakchi jamoalaridan biri, o'z oldiga har yili yuqori maqsadlarni qo'yadi. Bu yil maqsadimizdan chekinmaymiz. Bizdan faqat oldinga intilish talab etiladi.

- Tarkibda o'zbekistonlik futbolchilardan kimlar qo'shib olindi?

- Tarkibga o'zbekistonlik, rossiyalik, nigeriyalik futbolchilarni qo'shib oldik. Asiljon Begimqulov oldin ham bu erda o'ynagan, unga jamoa begona emas. Komolafe esa O'zbekiston Superligasida to'p tepgan. O'ylaymanki, mavsum startigacha tarkibimiz optimal holatga keladi.

- O'zbekiston Superligasida qaysi jamoalarning transferlar qiziqtira oldi?

- Qo'shnimiz bo'lgan O'zbekiston chempionatini doim katta qiziqish bilan kuzatamiz. O'rtoqlik uchrashuvlariga boramiz. Aytishim mumkinki, jamoalar qishda qiziqarli transferlarni amalga oshirishdi. "Paxtakor", "Nasaf", "Navbahor", "Neftchi" va hokazo. Chempionat bahslari ham shunga monand ravishda o'tadi deb taxmin qilaman. 

- Osiyo kubogiga Markaziy Osiyo mamlakatlarining mezbonlik uchun harakatini qanday qabul qildingiz?

- Osiyo kubogiga Markaziy Osiyo mamlakatlarining mezbonlik qilishidan faqat faxrlanish mumkin. Bu futbol rivojiga juda katta turtki bo'ladi. Agarda chempionat bizga ishonib topshirilsa, kelajak uchun ham foydasi tegadi.