Rustam Ashurmatov: "Suriyaga qarshi uchrashuvda zaif nuqtalarimizni bilib oldik"

- O'zbekiston uchun qiyin kechgan Suriyaga qarshi uchrashuv haqida qanday fikrdasiz?

- Suriyani yutishimiz kerak edi. Gol ura olmaganimiz sabab qiynaldik. O'yinga to'g'ri tayyorgarlik ko'rgan edik. Kechagi uchrashuvdan saboq chiqardik va o'zimizning zaif nuqtalarimizni bilib oldik.

- Keyingi raqibimiz Hindiston ham Avstraliya qarshi kechgan uchrashuvda juda zich himoyalandi. Kecha Suriya himoyasini yorib o'ta olmadik, Hindistonni enga olamizmi?

- Suriyaga qarshi o'yin dars bo'ldi. Endi xulosa chiqarib, zich himoyani yorib o'tishga harakat qilamiz.

- Kechagi o'yinga tanlangan taktik uslub haqida nima deya olasiz?

- Ushbu taktikani ancha vaqtdan beri qo'llab kelamiz. Bu himoyaviy uslub degan fikrlarga qo'shilmayman. CHunki hujum vaqti bor yo'g'i 3 markaziy himoyachi ortda qoladi, qolgan barcha o'yinchilar esa hujumga yordam berishadi.

- Kechagi uchrashuvdan so'ng mashhur statistika sayti sizga O'zbekiston terma jamoasi futbolchilari orasidagi eng baland baho berdi. Kecha namoyish etgan o'yiningizdan qoniqdingizmi?

- Men qanday o'ynaganimdan qatiy nazar jamoamiz g'alaba qozona olmadi. Jamoa yomon o'ynamadi, ammo gol ura olmadik. Suriya terma jamoasi ham bizning darvozamiz oldida deyarli vaziyat yaratmadi

Abdulvosit Bektemirov suhbatlashdi