Qirg'izistonning "Lider-Akademiya" jamoasida o'ynayotgan legionerlarimiz haqida bilasizmi?

Saytimiz muxbiri mazkur futbolchilar bilan bog'lanib, intervyu tashkil etdi.

Iskandar Mo'minov, darvozabon: - Hozirgi kunda Qirg'iziston chempionatining "Lider-Akademiya" jamoasida o'ynamoqdaman. Klub rahbariyati tomonidan jamoaga taklif etilganimda, ochig'i qaror qabul qilishda bir oz ikkilandim. Lekin endi hammasi yaxshi, jamoaning asosiy darvozaboni sifatida uchrashuvlarda ishtirok etayapman. Jamoada bizga yaratib berilgan sharoitlar yaxshi, oylik maoshlar vaqtida to'lab berilmoqda. "Lider-Akademiya" jamoasi Qirg'iziston chempionatida ishtirok etadi. Klub infratuzilmasi yaxshi shakllantirilgan, mashg'ulotlar bazasi va maydonlar xolati alo darajada deb aytish mumkin.

Ayni vaqtda bizda ikkinchi davra uchrashuvlari boshlandi. Jamoamizni Rossiyalik murabbiy Viktor Demidov boshqarmoqda.Nasib qilsa, astoydil harakat qilib, jamoani yuqori o'rinlarni egallashiga o'z hissammizni qo'shmoqchimiz.

Arslon Sultonov, hujumchi: - Yaqinda Qirg'iziston chempionatida ishtirok etuvchi "Lider-Akademiya" jamoasiga ko'chib o'tdim. Klub rahbariyati tomonidan meni jamoaga taklif qilishdi, shartnoma shartlari bo'yicha kelishib oldik. Klubda yaratilgan sharoitlar yaxshi, mashg'ulot o'tkazish uchun alohida maydonlar bor. Jamoa bosh murabbiyi Viktor Demidov hisoblanadi. Klub rahbariyati tomonidan jamoaga barcha sharoitlar yaratib berilmoqda. Ikkinchi davraning dastlabki uchrashuvida asosiy tarkibda maydonga tushdim. Jamoaning asosiy maqsadi, bu mavsumda jamoani to'liq shakllantirishdan iborat.

Malumot uchun, "Lider-Akademiya" jamoasi ayni damda Qirg'iziston chempionati musobaqa jadvalida so'ngi o'rinni egallab turibdi.

Bekzod Tolibov suhbatlashdi