Qarshiga chempionlik qaytadimi?

2022 yilda amaldagi chempionning ishlari o'xshamayotgan bo'lsa, "Bunyodkor-W" hozircha 2-pog'onada turibdi. "Sevinch" esa 3 yillik tanaffusdan keyin yana taxtga qaytmoqchi. Quyida shu haqda...

"So'g'diyona-W" kurashdan chiqdimi?

O'tgan mavsum oxirida "Oltin dubl" qayd etgan Jizzax klubi ayni paytda musobaqa peshqadamidan 7 ochko ortda qolyapti. Bu farq so'nggi 4 turda yo'qotilgan 6 ball tufayli kattalashib ketdi. 

Jamoa mavsum yakunida 1-o'rinda bo'lmasligini yil avvalida ham taxmin qilish mumkin edi. CHunki "So'g'yodiyona-W" etakchilarining raqobatchi klublar safiga borib qo'shilishi "bo'rilar" rahbariyati joriy mavsumga jiddiy qaramayotgani to'g'risida tasavvur paydo qildi.

SHerali Boboqulov shogirdlaridan chempionlikni saqlab qolish uchun keyin 5 o'yinda 7 ochkolik farqni yo'qqa chiqarish talab qilinadi.

"Qaldirg'ochlar" bo'sh kelmayapti 

"Bunyodkor" qizlarining hozirgi holatiga jamoa yigitlari havas bilan qarasa, arziydi. Ammo kumush medallar Elmira Gulyamovani qoniqtirmasligi aniq. Uning shogirdlari kecha "Metallurg-W" darvozasiga javobsiz 11ta to'p kiritishdi.

"Bunyodkor-W" chempion bo'lishni istasa, qolgan o'yinlarning barchasini yutadi yoki Qarshi klubining qoqilishini kutadi.

Rekord yangilanadimi?

"Sevinch" esa, nihoyat, uyg'ondi. Yil boshida "Nasaf"ga qo'shib yuborilgan jamoa qizlari 11-turdan beri musobaqa karvonboshisi bo'lib turibdi. Qashqadaryolik qizlar nafaqat ochko to'plash, balki goleadorlik borasida ham boshqa hamkasblariga o'rnak bo'lishyapti: 17 o'yinda 107 ta gol.

"Sevinch" tarixida faqat 2 bor bundan yaxshiroq natija qayd etilgan: 2018 yil — 148, 2019 yil — 132 gol. Demak, bu yil ayollar futbolidagi eng sovrindor jamomizning sermahsullik borasidagi shaxsiy rekordi yangilanishi mumkin.

"Navbahor-W"da pasayish

O'tgan mavsumni jadvalning 2-qismida etakchi sifatida yakunlagan namanganlik qizlar bu yil eng yomon natijani qayd etishyapti. Jamoa 17 o'yinda to'plagan 1 ochkosi bilan Oliy ligada mutlaq autsayder bo'lib turibdi. O'z darvozasidan naq 91ta to'p o'tkazib yuborgan "lochinlar" raqib posbonlarini atigi 4 marta ranjitishdi. Bu ketishda "Navbahor" qizlari kelasi mavsumni Birinchi ligada boshlashi hech gap emas.

To'purarlar poygasi

Bu boradagi kurash 2 kishi o'rtasida kechmoqda. "So'g'diyona-W" forvardi Diyoraxon Habibullaev hozircha chempionatning eng yaxshi snayperi bo'lib turibdi (31). Uni 29 ta gol bilan Nilufar Qudratova ("Sevinch") taqib qilib kelyapti.

MUSOBAQA JADVALI

Xullas, Oliy ligada shunaqa gaplar. "Sevinch" 3 yillik tanaffusdan keyin Qashqadaryoga chempionlik ruhini qaytarishi mumkin. Ayni paytda "Nasaf" ham Superligada karvonboshilik qilyapti. Sizningcha, oltin medallar uchun qaysi jamoaning imkoniyati yuqoriroq?

Muallifning telegramdagi kanali → FR| futbol ANALIZI