O'rtoqlik uchrashuvi. "Paxtakor" "Dinamo"ni mag'lub etdi

Birinchi bo'limda samarqandliklarga qarshi Ilhom Mo'minjonov boshchiligidagi yoshlar tarkibi bahs olib bordi. Bo'lim mobaynida yosh futbolchilarimiz tajribali raqibdan ortda qolmaslikka intilishdi. Ular buni uddalashdi ham. Himoyachilar deyarli bexato harakat qilishdi. Ikki bor Ribkin qiyin vaziyatda yaxshi o'ynadi. Tanaffusga jamoalar golsiz durang bilan yo'l olishdi.

Ikkinchi bo'limda asosiy tarkib tushirildi. Andreevning ikki zarbasi keskin holatni yuzaga keltirdi, biroq raqib posboni mahorati va noaniq zarba har ikki vaziyatda foyda keltirmadi. 69-daqiqada Stas jarima zarbasidan unumli foydalandi. 22 metrlardan belgilangan jarimani Andreev ajoyib tarzda darvozaga yo'lladi. Ushbu natija o'yin oxirigacha o'zgarmadi va jamoamiz g'alaba qozondi. Navbatdagi nazorat uchrashuvi 26 iyul, shanba kuni "Jar" stadionida O'zbekiston 23 yoshgacha bo'lgan terma jamoasiga qarshi o'tkaziladi.

"Paxtakor" - "Dinamo" - 1:0 (0:0)

"Paxtakor": Ribkin (Tursunboev, 31), Isroilov, Grigorev, Ibr.Abdullaev, Azamov (Otaxonov, 33), Sohibov, Mirzaev (Xursanov, 33), Maxsitaliev, Cidiqov (J.Yusupov, 33), Rogovanov, A.Yusupov.

Ikkinchi bo'lim: Lobanov, Merzlyakov, Ubaydullaev, Fomin, Boltaboev, Maxaradze, Qilichev, Masharipov, Andreev, Karimov, Soliev.

Gol: Andreev, 69 - 1:0.