Ollobergan Karimov: "Orzularimdan biri amalga oshdi. Argentina bilan munosib o'ynadik"

Farhod Nishonov boshchiligidagi terma jamoamiz bu bellashuvda durang natija qayd etdi. Bahsdan so'ng terma jamoa azosi Ollobergan Karimov fikrlarini bildirdi. 

"Argentinaga qarshi dastlabki uchrashuvda yomon o'yin ko'rsatganimiz yo'q. Ikki gol ham etiborsizligimiz natijasida darvozamizdan joy oldi. Ikkinchi o'yinda esa xatolar ustida ishlagan holda maydonga tushdik. Murabbiylar tomonidan ishlab chiqilgan rejani amalga oshirishga harakat qildik deb o'ylayman. Fikrimcha, argentinaliklar oldida munosib to'p tepdik. 

Messi va boshqa yulduzlarning o'yinimizga tashrif buyurgani salbiy tomondan hech qanday tasiri bo'lmadi, aksincha bu futbolchilar oldida o'z o'yinimizni ko'rsatish yoqimli bo'ldi. Messi dunyoning eng zo'r futbolchisi. Tug'ilganimdan beri uning o'yinlarini ko'rib kelaman. Ko'pchilik singari orzularimdan biri amalga oshdi. 

Urugvayda ham yaxshi qarshi olishdi. Bu bahslarga yuz foiz tayyormiz deya olaman. Sardorimiz aytganidek mazkur o'yinlar orqali faqat katta tajriba to'playmiz. Maqsadimiz Osiyo chempionatida akalarimiz kabi chempionlikni qo'lga kiritish",- deydi Ollobergan Karimov. 

Malumot uchun vakillarimiz ertaga Urugvayga qarshi birinchi o'rtoqlik uchrashuvida maydonga tushadi. Oradan ikki kun o'tib esa 17 oktyabr kuni ikkinchi to'qnashuvda ishtirok etishadi.