"Oldimda Eron, BAA va Kuvayt klublaridan takliflar mavjud" - Rizo Yazdando'st

- Rizo, birinchi marotaba legioner sifatida o'zbek klubida faoliyat yuritdingiz. SHu haqda fikringiz qanday?

- Ha, birinchi marta Erondan tashqarida faoliyat olib bordim. Yurtingizda futbolchilar uchun juda yaxshi sharoitlar yaratilgan. O'zim harakat qilgan Bekobod klubida xam qulayliklar etarli, bu erda professionallar ish olib borishadi va eng asosiysi, ahil jamoa mavjud. Muxlislarning ham futbolga mehri ajoyib ekan.

- "Metallurg" jamoasidan ketishingizga nima sabab bo'ldi?

- Bunga asosiy sabab – onamning betobligi. Onam yaqinda jarrohlik operaciyasini o'tkazdi. Men uning yonida bo'lishim kerak edi. SHu sababli O'zbekistonni tark etishga majbur bo'ldim.

- Sizningcha, O'zbekiston va Eron chempionatlari o'rtasida qanday farq mavjud?

- Ikki mamlakat futbolidagi farq sezilarli emas. Eronda jismoniy holat va individuallikka alohida etibor beriladi. Murabbiy va futbolchilarga bo'lgan bosim xam yuqori. O'zbekiston jamoalari asosan intizomli, jamoaviy futbol o'ynashga intiladilar. Fikrimcha, yaqin yillar ichida futbolingiz yanada o'sishga erishadi. Sababi yurtingizda akademiyalar va bolalar futboliga bo'lgan etibor meni yaxshi manoda hayron qoldirdi.

- Kelgusidagi rejalaringiz haqida ayta olasizmi? Agar o'zbek klublaridan taklif bo'lsa, qabul qilarmidingiz?

- Hozir menga Eron, BAA va Kuvayt klublaridan takliflar mavjud. Tez orada yakuniy qarorni qabul qilaman. O'zbekistonga qaytishni istar edim, lekin afsuski, hozir onam va oilamga yaqinroq joyda bo'lishim kerak.

Furqat Po'latov suhbatlashdi.