"Odil Junior Capri"ning eng yaxshi futbolchilari ko'rikdan o'tish uchun Milan shahriga boradilar

Odil Ahmedov va "Dolce Italia" kompaniyasi homiyligida amalga oshirilgan hamkorlik natijasida, shu yilning 28 noyabr - 7 dekabr kunlari klub tarbiyalanuvchilari Italiyada ko'rikdan o'tadigan bo'ldilar.

Unga ko'ra "Karpi" futbol klubi akademiyasi murabbiylari 4 kun davomida Abruccodagi filiallarida o'zbekistonlik yosh futbolchilar bilan mashg'ulot o'tkazadilar. SHundan so'ng, Milanda ko'rik bo'lib o'tadi. 2 kun davom etadigan ko'rik blic turnir asosida tashkil qilinadi unda Milan va Turin jamoalari qatnashadilar. Bularni barchasi "Odil Junior Capri"ning Italiyaga tashrif buyurishi munosabati bilan bo'layapti.

2007 va 2008 yillarda tavallud topgan 9 nafar futbolchi "Karpi" jamoasiga manzur kelsa, ularning ota-onalari bilan shartnoma imzolanadi.

Safar davomida klubning ikki nafar murabbiylari, Zayniddin Tojiev va Jahongir Usmonov Evropa metodikasi bilan yaqindan tanishadilar.

"8 oy davomida qilgan mehnatimizni sinab ko'rish maqsadida klub rahbariyati bizni Italiyaga yuborayapti. Etiborlisi shundaki, safarga shu yoshdagi eng istedodli futbolchilar yo'l olayapti. Bu erda hech qanday pul rol o'ynamadi. Maqsadimiz o'zbek istedodini nimalarga qodirligini ko'rsatish va italiyalik skautlarni nazariga tushish, futbolchi bo'lib kuchli beshlikka bora olmadim, shogirdlarimdan hech bo'lmasa biri muvaffaqiyatga erishsa men o'sha erda to'p tepgandek bo'laman. Bizni qo'llab-quvvatlayotgan sobiq jamoadoshim Odil Ahmedov va "Dolce Italia" kompaniyasiga ham o'z minnatdorchiligimni bildiraman", - deydi Zayniddin Tojiev.