"Neftchi" ustozi: "Bugungi o'yin jamoamizdagi yosh futbolchilar uchun katta tajriba maktabi bo'ldi"

Uning birinchi qismida mehmonlar bosh murabbiyi Abdusamad Do'rmonov ishtirok etdi.

“Bugungi o'yin jamoamizdagi yosh futbolchilar uchun katta tajriba maktabi bo'ldi, tom manoda "Navbahor" futbolchilari bugun mahorat bo'yicha ustun kelishdi. Birinchi bo'limning dastlabki daqiqalarida futbolchilarimiz kuchli raqibga munosib qarshilik ko'rsatishdi. CHamasi 30-daqiqalargacha yaxshi o'yin tashkil etayotgan edik, ammo o'tkazib yuborilgan gol jamoamiz azolarini ruhan sindirib qo'ydi.

Ikkinchi bo'limda shogirdlarim ko'rsatgan o'yindan qoniqish hosil qildim. Albatta "Navbahor"ga qarshi ochiq futbol namoyish etish qiyin, shundan kelib chiqib qarshi hujumlarga tayanib o'ynadik. Jamoamiz azolari asosan yoshlardan iborat, shundan kelib chiqadigan bo'lsak, bugun ularga ko'plab vaziyatlarda tajriba etishmadi. Biz bugun mavjud imkoniyatimizdan kelib chiqib o'yin tashkil etdik. SHuni unutmaslik kerak, "Neftchi" PRO-Ligada o'ynaydi. Bu futbol, unda g'alaba va mag'lubiyat yonma-yon yuradi.

Ha bugun futbolchilarimizda o'yin davomida hayajon kuzatildi. Islombek Karimov bazi vaziyatlarda o'yinni o'ziga oldi, bazi vaziyatlarda esa o'yini chiqmadi. "Neftchi"ning ayrim asosiy tarkib futbolchilari OTMlarga kirish uchun imtixon jarayonida ishtirok etganliklari tufayli o'yinoldi mashg'ulotlarimizda ishtirok eta olishmadi. Balki shuning uchundir o'yin davomida jamoamiz azolarida charchoq alomatlari sezildi.

Farrux Turdalievni nega tushirmadim? Bizda kim tayyor bo'lsa, o'sha o'ynaydi. Rayimjonov bo'lsin, Turdaliev bo'lsin, jismoniy holatidan kelib chiqib, asosiy tarkibga kiritiladi" - deydi Abdusamad Do'rmonov.

Bekzod Tolibov yozib oldi