Muxtor Qurbonov: "Futbolda 2:0 hisobida oldinga chiqib olish g'alaba uchun juda yaxshi imkoniyat, lekin..."

- Nima uchun jamoa kechagi o'yinda 2:0 hisobida oldinda borayotib ikkita gol o'tkazib yubordi?
- O'zi gol urish qiyin bo'layapti, ikkinchi golni urganimizdan keyin esa yosh bolalarcha xato evaziga keyingi daqiqadayoq to'p o'tkazib yubordik. Bu gol "Buxoro"ga qo'shimcha kuch bag'ishladi va ular ikkinchi golni ham urishdi.

Kechagi o'yinni umumiy olib qaraganda biz g'alaba qozonishimiz kerak edi. Futbolda 2:0 hisobida oldinga chiqib olish g'alaba uchun juda yaxshi imkoniyat deb o'ylayman. Afsuski, so'nggi paytlarda shoshma-shosharlik va palapartish harakat qilish evaziga oddiy vaziyatlarda gollar o'tkazib yuborayapmiz. Mana shu muammoni bartaraf eta olmayapmiz, balki men o'yinchilarga bu narsani singdira olmayotgandirman. Kecha ham xuddi shu narsa takrorlandi. "Buxoro" oliy ligada jon saqlab qolish uchun kurashayapti, ikkinchi davrada murabbiylar almashdi. SHu sababli ulardan kuchli o'yin kutgandim. Lekin, futbolchilarim yaxshiroq harakat qilishdi. Ikkita to'p farqi bilan oldinda bora turib o'z darvozamizdan ikkita to'p o'tkazib yuborganimiz achinarli bo'ldi.

- Diskvalifikaciya tufayli o'yinni o'tkazib yuborgan Igor Taranning yo'qligi bilindimi?
- Qaysidur manoda Taranning yo'qligi o'z tasirini o'tkazgandir, lekin hozir paytda bir o'yinchini o'rnini boshqa futbolchi to'ldira olishi zarur. Busiz klub yaxshi natijaga erisha olmaydi. Jamoadagi boshqa hujumchilar Taranning yo'qligini bilintirishmadi deb o'ylayman.

Tolibjon Qosimov suhbatlashdi