"Meksika bilan o'yinga qo'rquv ostida chiqqanmiz" - Messi JCH-2022 dagi eng qiyin pallani esladi

Qo'rquv va bosim:

Messi 2006 yilgi mundial va 2022 yilgi turnirdagi Meksikaga qarshi o'yinlarni taqqoslar ekan, Qatardagi bosim dahshatli bo'lganini yashirmadi:

"Menga 2006 yilga qaraganda ancha qiyin bo'ldi, chunki bosim umuman boshqacha edi. Agar g'alaba qozonmasak, musobaqadan deyarli chiqib ketardik. Ushbu o'yinga qo'rquv bilan chiqqanmiz, chunki ongostimizda nimalarni boshdan kechirganimizni o'ylardik. Mag'lub bo'lishdan va keyingi bosqichga o'ta olmaslikdan qo'rqqanmiz".

Hal qiluvchi burilish va xalos bo'lish:

Leoning so'zlariga ko'ra, aynan Meksika darvozasiga urilgan gol jamoaga ruhiy erkinlik bergan:

"Goldan keyin xotirjam tortdik, o'zimizni erkin his qildik. Bu hamma uchun o'ziga xos xalos bo'lish edi. Biz yana boshlang'ich nuqtaga qaytdik va o'z taqdirimizni o'zimiz nazorat qila boshladik. Saudiya Arabistoni bilan o'yin biz uchun hech narsani o'zgartirmasligi kerak edi, lekin miya sen bilan yomon hazil qiladi. Yutishimiz mumkin, lekin yutqazsak chiqib ketamiz, degan o'y bor edi".

Emiliano Martinesning seyvi va jamoaviy kuch:

Messi darvozabonning muhim seyvlari va jamoaning keyingi yo'liga ham to'xtalib o'tdi:

"Dibu (Emiliano Martines) qaytargan jarima zarbasini ko'rganimda... O'sha lahzada: "Agar bu gol bo'lsa, tamommiz. Buni qanday engib o'tamiz?" deb o'ylaysan. Bunday paytda kayfiyat juda muhim.

Bu vaziyatlar bizni juda kuchli qildi. Turnir davomida Niderlandiya yoki Franciya bilan o'yinlarda qulab tushishimiz mumkin bo'lgan 500 ta holat bo'ldi, lekin biz jamoa sifatida mustahkam edik. Meksika bilan o'yin biz uchun hal qiluvchi bo'ldi, aynan o'shanda bizga eng qiyin bo'lgan edi", — dedi Messi.

Eslatib o'tamiz, aynan shu og'ir yo'ldan so'ng Argentina terma jamoasi o'z tarixida uchinchi bor Jahon kubogini boshi uzra baland ko'targan edi.