Markaziy Osiyo mamlakatlarining chempionatlari. Sergeev jamoasi ikkinchi, "Istiqlol" yana peshqadam, startda turgan Turkmaniston

QOZOG'ISTON

Qozog'iston chempionatida ham bizdagi singari to'rtta tur ortda qoldi. Natijalarga ko'ra, "Qiziljar" klubi maksimal natija qayd etgan holda 12 ochko bilan peshqadam bo'lib turibdi. Igor Sergeev to'p tepadigan "Tobol" jamoasi 10 ochko bilan ikkinchi o'rinda bormoqda. Kuchli uchlikni 9 ochko bilan "Aktobe" yakunlagan. Bobir Abdixoliqov hamda SHahboz Umarov faoliyatini davom ettirayotgan "Ordabasi" jamoasi ham 9 ochko bilan 4-o'rinda joylashgan.

To'purarlar bahsida "Aktobe" hujumchisi Maksim Samorodov 4 ta gol bilan peshqadamlik qilmoqda. SHuningdek, Evgeniy Kozlov (Atirau), Artur SHushenenachev (Qayrat), Vasiliy Sovpel (Qaysar) va Miras Turlibek (Aksu)da uchtadan gol mavjud. Bobir Abdixoliqov, SHahboz Umarov va Igor Sergeev ikkitadan to'p kiritgan.

QIRG'IZISTON

Qirg'iziston Premer-ligasida 1-tur uchrashuvlari yakunlandi. Dastlabki tur yakunlariga ko'ra, "Alga" peshqadam bo'lib turibdi. Qo'chqor-Otaning "Neftchi" va "Alay" jamoalari keyingi o'rinlarni band etib turibdi. Tur davomida 6 ta gol turli futbolchilar tomonidan urildi, shu bois dastlabki turdan so'ng yaqqol to'purar yo'q.

TOJIKISTON

Tojikiston Oliy ligasida ham dastlabki tur bahslari o'tkazildi. Mamlakatning amaldagi chempioni "Istiqlol" 1-turdan keyinoq yana peshqadamga aylandi. Dushanbeliklar "Xo'jand" darvozasiga javobsiz 4 ta to'p kiritishdi. "Regar-TadAZ" va "Ravshan" jamoalari 2 va 3-o'rinlarni band etishdi. To'purarlar ro'yxatida "Esxata" hujumchisi Baxtiyor Zaripov 3 ta gol bilan ustunlik qilmoqda. Alisher Jalilov (Istiqlol) va Tohir Malodo'stov (Ravshan) hisobida ikkitadan gol mavjud.

TURKMANISTON

Turkmaniston Yuqori ligasi bugun start oladi. CHempionatda 8 ta jamoa o'zaro kurash olib boradi. Amaldagi chempion "Axal" klubi hisoblanadi.