"Lokomotiv" portugaliyalik murabbiy boshchiligida Turkiyada yig'in o'tkazadi

"Temiryo'lchilar" 7 yanvar kuni portugaliyalik mutaxassis Mikael Sekeyrani bilan shartnoma imzolanganini rasman elon qilishgandi. Bugungi kunga kelib klub Sadriddin Abdullaev, Javohir Sidiqov, Islom Qobilov, Sanjar Qodirqulov, Abdumavlon Abdujalilov va Xurshid Muxtorovlar bilan tarkibni kuchaytirib olishga erishdi. Bundan tashqari, kecha ispaniyalik markaziy himoyachi bilan ham muzokara olib borilayotgani haqida xabar bergan edik.

Eshitdik-da: "Lokomotiv"ga ispaniyalik futbolchi keladi

"Lokomotiv" yangi murabbiy qo'l ostida 14 yanvar kuni yig'inni boshlagan. "Championat.asia" olgan malumotlarga ko'ra, jamoa Toshkentdagi ikki haftalik yig'indan so'ng 28 yanvar sanasida ikkinchi yig'inni o'tkazish uchun Turkiya uchib ketadi. Turkiyaning janubida joylashgan Antaliya shahridagi yig'in 28 yanvardan 12 fevralga qadar davom etadi. U erda o'tkaziladigan nazorat o'yinlarida Sekeyra shogirdlariga qaysi jamoalar raqib bo'lishi hozircha aniq emas.

Eslatib o'tamiz, "Lokomotiv" o'tgan mavsumni Superliganing 9-pog'onasida tugatgan. Bu yil esa jamoa jiddiyroq maqsadlar sari qadam tashlamoqda.

P.S. "Championat.asia" xodimlari "Lokomotiv"ning bugungi mashg'ulotini yoritish uchun yo'l olishgan, tushdan so'ng mashg'ulotdan suratlarni tomosha qilishingiz mumkin.