"Lochin" ustozi Eldor Moyliev: "Pro ligada kuchli uchlikka kirishga harakat qila olamiz"

Jamoa ustozi Eldor Moyliev "Aral"ga qarshi kechgan nazorat uchrashuvidan so'ng fikrlari bilan o'rtoqlashdi.

"Tayyorgarlikning ikki bosqichini Qarshida o'tkazdik. Ayni paytda poytaxtda nazorat uchrashuvlarida ishtirok etyapmiz. Barchasi rejamiz bo'yicha ketmoqda. 8 ta nazorat o'yinlari belgilangan, bu orqali sport formamizni optimal holatga olib kelishni maqsad qilganmiz. Barchaga o'ynash imkoniyatini beryapmiz desam yanglishmayman",- deydi Eldor Moyliev.

- Tarkibni shakllantirishda muammolar bo'lmayapti?

- "Lochin"dagi yigitlar bilan "Nasaf-Farm" jamoasida birga ishlaganmiz, shu bois qiyin bo'lmayapti. Ular bilan Birinchi ligadan Pro ligaga chiqqandik. Tajribali futbolchilarni ham taklif qilyapmiz. Yaxshi jamoa shakllantirishni niyat qilganmiz deya olaman. 

- Debyutant jamoa uchun maqsadlar qanday?

- Ko'ryapsiz, jamoalar o'rtasida farq yo'q. Hamma jamoa bilan o'ynasa bo'ladi. Shogirdlarimga yuz foiz ishonaman. Salohiyatimizdan kelib chiqib kuchli uchlikka harakat qila olamiz. 

- Jamoaning tajribali hujumchisi Zafar Polvonov o'tgan yili Birinchi ligada gollar urdi. Uning taqdiri nima bo'ldi?

- Zafar Polvonovda yosh o'z so'zini aytadi. Pro ligada tezlik kerak. Iqtidorli hujumchi, lekin uni o'z xohishi bilan U-19 jamoamizga murabbiy etib tayinladik.