Kun intrigalari. Niderlandiya guruhda qolib ketishi mumkin, Qatar or-nomus uchun o'ynaydi

Do'stlar, bugun 3-tur o'yinlari start oladi. FIFA bir guruhdan joy olgan jamoalarning o'yin startlarini bir xil vaqtga belgiladi. Maqsad esa aniq futbolga futboldan tashqari elementlarning aralashuvini cheklash. Demak, bugun "A" guruhida nimchorak finalga chiqqan ikki jamoaning nomi oydinlashadi. So'ngi tur oldidan "A" guruhida vaziyat qanday? Quyida shu savolga javob topamiz.

"A" guruhi

Ko'rib turganingizdek, guruhda "uchar gollandlar" 4 ochko bilan peshqadam. Turnir kashfiyotlaridan biri bo'lgan Ekvador Niderlandiya bilan bir xil ochko to'plagan va qo'shimcha ko'rstakichlar bo'yicha 2-o'rinda, Manesiz o'ynayotgan senegalliklar esa 3 ochko bilan 3-pog'onada va mezbon Qatar ochkosiz so'nggi o'rinda. 

"A" guruhi 3-tur uchrashuvlari:

Niderlandiya – Qatar (20:00. Sport TV/Futbol 1)

Ekvador – Senegal (20:00 "Mahalla"/Match TV)

Niderlandiyaliklar autsayderga qarshi o'yinda guruhda 1-o'rinni olish va "B" guruhi ehtimoliy g'olibi Angliyadan qochishga urinadi. Qatarning guruhda qolib ketishi aniq bo'lganini bilasiz. Mezbonlar so'ngi turda or-nomus va muxlislar oldidagi qarzlarini uzishga intilishadi va "uchar gollandlar"ni guruhda olib qolishlari ehtimoli ham yo'q emas.

Turnir kashfiyotlaridan biriga aylangan Ekvador termasi so'nggi turda Senegaldan ochko olishga intiladi. Senagalliklarning vazifasi esa bir muncha qiyinroq, ular maksimal g'alabaga intilishadi. Bungacha ikki jamoa bir marotaba to'qnash kelishgan. 2002 yilda bo'lib o'tkan o'rtoqlik o'yinida Senegal mehmonda minimal hisobda zafar quchgan. Ekvadorning Qatar va Niderlandiyaga qarshi o'yinlari fonida ustunlik ular tomondadek, lekin 1 ta o'yin barchasini hal qiladi. Hamma narsa bo'lishi mumkin.

Uchrashuvda janubiy amerikaliklar etakchisi Enner Valensiya jarohat sabab ishtirok etmasligi mumkin. Valensiya faktori Ekvadorning imkoniyatlarini biroz pasaytiradi. 

Futboldagi matematika

Agarda o'yinlar yakunlangach, ochkolar soni teng kelib qolsa, quyidagi kriteriyalarga qaraladi.

1. To'plar farqi (urilgan va o'tkazib yuborilgan gollar orasidagi farq).

2. Jami o'yinlarda urilgan gollar soni.

3. O'zaro o'yinlardagi ko'rsatkichlar.

4. Agarda yuqoridagi ko'rsatkichlarda mutlaqo tenglik qayd etilsa, sariq va qizil kartochkalar soniga etibor qaratiladi.

Sizningcha, "A" guruhidan qaysi jamoalar pley-offga yo'l olishadi?

Jaloliddin Xalilov