Kamoliddin Tojiev: "Yigitlarni tanimadim. Nima bo'lganini bilmayman..."

"O'yinni yaxshi boshlay olmadik. Balki maydonni tozalash kerakligi uchun ko'p kutib qolib ketgandirmiz. Ikkinchi bo'limda o'zimizga ikkita gol olib keldik. Yigitlarni tanimadim, ertaga buni tahlil qilib chiqamiz va xulosalar chiqaramiz", — dedi Kamoliddin Tojiev mag'lubiyatdan so'ng.

- Bugungi mag'lubiyatdan so'ng Superkubok finalidagi imkoniyatlar pasayib ketmaydimi?

- Yo'q. Final bitta o'yindan iborat. Bilmayman, bugun bizga nima bo'ldi. Barchasini tahlil qilamiz.

- Dastlabki ikki turda Hamdamov va Pajishekni zaxiradan maydonga tushirgan edingiz. Bugun esa polshalik hujumchini asosiy tarkibda ko'rdik. Ushbu qaror o'zini qanchalik oqladi?

- Bugun butun jamoa yaxshi o'ynay olmadi. Nima bo'lganini bilmayman, ochig'i. Shuning uchun tahlil qilib chiqamiz deb aytyapman.

- "Paxtakor" bugun raqibdan o'yinning barcha jabhalarida ortda qolganini tan olasizmi? Balki qaysidir jihatlar bo'yicha jamoangiz yaxshiroq bo'lgandir.

- Barcha aspektlarda demagan bo'lardim. O'zimizga yo'q joydan ikkita gol olib keldik. Nega penalti olib kelganimizni bilmayman. Boshqa ko'zga ko'rinarli vaziyat bo'lmadi.

- Sergeev va Hamrobekovni "Paxtakor"da ko'rishimiz mumkinmi? Agar FIFA ruxsat bersa?

- Ko'ramiz. Birinchi navbatda FIFA bunday imkoniyatni taqdim etishi kerak. Shundan so'ng muzokara olib boramiz.

- Penalti belgilanishidan oldin ham Ibragimov qoida buzgan edi. 11 metrlik jarima zarbasi ham uning xatosi tufayli belgilandi. Ibragimovni zaxiraga olishga kechikdim deb o'ylaysizmi? U bugungi o'yin biroz asabiylashib ketgandek tuyuldi...

- Ibragimov biroz asabiy o'yinchi. Bu futbol. Ko'rib chiqamiz va nima ro'y berganini bilib olamiz. Uni oldinroq zaxiraga olmoqchi edim.

- Noqulay ob-havo sharoiti jamoangiz o'yiniga qanchalik tasir qildi?

- Ob-havo ikki jamoa uchun ham bir xil edi.

- Timur Kapadze hozirgina ushbu uchrashuvga juda jiddiy yondashgani haqida aytib o'tdi. "Paxtakor"ning bugungi mag'lubiyatida murabbiylarning shtabi qanchalik aybdor? Raqib jamoa murabbiylar shtabi aynan bugungi uchrashuvda o'ta jiddiy tayyorgarlik ko'rgan ekan.

- Bunga javobni o'yinni tahlil qilib bo'lganimizdan so'ng bilib olamiz.

- Ikkinchi bo'limning startida o'tkazib yuborilgan gol o'yinga qanchalik tasir qildi?

- Birinchi daqiqadayoq gol o'tkazib yubordik.

- Hakamlarning ishiga baho berib o'tsangiz?

- Bu haqda gapirmayman.