Kamoliddin Tojiev: "Tarkibimizda 20ta asosiy futbolchi bor. Raqib 10 kishi bo'lib himoyalandi"

"Raqib 10 kishi bo'lib himoyalandi. Bunday himoyani yorib o'tish juda qiyin. Ikkinchi bo'limda esa boshqacha vazifa qo'ydik va ko'proq vaziyatlarga ega bo'ldik. G'alaba bilan tabriklayman. Bugun 120%ga harakat qildik" - dedi Kamoliddin Tojiev.

- "Paxtakor"da bor-yo'g'i ikkita hujumchi bor. Tanlov yo'qligi kelajakda pand berib qolmaydimi?

- Qishda uchta hujumchini ko'rib chiqdik va yakuniy qarorimiz Pyotr bo'ldi. Tanlovda adashmaganimizni bugun bildik. Hamdamov hujumda ham o'ynay oladi. Oybek ham oldinroqda o'ynashi mumkin. Xavotirga o'rin yo'q, har bir poziciyaga ikkitadan o'yinchimiz bor.

- "Paxtakor" paragvaylik bir hujumchi va portugaliyalik Joau Koshta ismli futbolchilar bilan muzokara olib borgan emish. Ushbu hujumchilar bilan muzokaralar ijobiy yakun topmaganiga nima sabab bo'ldi?

- Portugaliyalik tibbiy ko'rikdan o'ta olmadi. Unda jarohat bor ekan. Paragvaylik futbolchi esa O'zbekistonga kelishga ko'nmadi.

- Flamarion va Bo'rievda kichik jarohatlar bor. Ular qachon safga qaytadi?

- Bo'riev bugun zaxirada edi. Flamarion esa shamollab qoldi.

- Alijonovning holati qanday?

- Tizzasidan jarohat oldi. Tekshiruvdan so'ng jarohat qanchalik jiddiy ekanligini bilib olamiz.

- Alijonov maydonni tark etguniga qadar deyarli barcha hujumlar u orqali amalga oshirildi. Bu atayin tanlangan rejamidi?

- Mening ko'rsatmam - futbol o'ynash. Qanotdan pas berish orqali hujum uyushtirish. Bunday ko'rsatma berganim yo'q.

- Hozirgi kunda yarim himoyachilar o'rtasida asosiy tarkibni tanlashga qiynalmayapsizmi yoki vingerlarda?

- Qiynalmayapmiz. Barcha futbolchilar o'yin amaliyotiga ega bo'ladi. Chempionat juda uzoq davom etadi. OCHL va Kubok bahslari ham bo'ladi. Barcha futbolchilar o'z imkoniyatiga ega bo'ladi.

- Turdimurodov asosiy hujumchi bo'ladimi yoki legioner futbolchi?

- Biz legionerni ko'p kuzatib bordik va shundan so'ng jamoaga chaqirdik. Tarkibimizda 18-20ta futbolchi bor va ularning barchasi asosiy futbolchilarimiz. Aynan qaysidir futbolchini asosiy deb ko'rsatmayman. Barcha o'yinchilar teng.

- Birinchi va ikkinchi bo'lim o'rtasida qanday taktik o'zgarishlar qildingiz?

- Birinchi taymda ko'proq o'rtadan yorib kirmoqchi bo'ldik. Bunday himoyalangan jamoaga qarshi esa markazdan kirish qiyin bo'ladi. Shu sababli tanaffusdan so'ng ko'proq qanotdan amalga oshirilgan paslar orqali raqib darvozasiga xavf tug'dirishga harakat qila boshladik.

- "Paxtakor"ga qarshi barcha jamoalar himoyaviy o'yin taklif etadi. Ushbu muammoga qanday echim topmoqchisizlar?

- Bu har doim bo'lib kelgan. Har bir raqibni o'rganib chiqib echim topamiz.

- Azizbek Turg'unboev transfer oynasi yopilishiga bir necha kun qolganida jamoani tark etdi. Turg'unboev "Paxtakor" bilan Turkiya yig'inlarida ham ishtirok etdi. Turg'unboev jamoani so'nggi pallada tark etishiga nima sabab bo'ldi?

- Futbolchi ko'proq o'yin amaliyotiga ega bo'lish istagini bildirdi. Shu sababli klub uni qo'yib yuborishga qaror qildi. Ikki tomon ham rozi bo'ldi.

- Nasrullaev, Bozorov va Mozgovoyning bugungi uchrashuvdagi ishtiroki haqida gapirib o'tsangiz?

- Ular terma jamoa azolari. Bugun maydonda ham o'z darajasini namoyish etishdi. Bugun barcha futbolchilar 120%ga harakat qilishdi. Ular Superligadagi har bir jamoaga katta foyda keltirishi mumkin.

- Keyingi bahs "Qo'qon-1912"ga qarshi. "Paxtakor" o'tgan mavsumda aynan Qo'qondagi uchrashuvda chempionlik "poyga"sini tark etgan edi. Bu safar Qo'qonga revansh maqsadida borasizlarmi? 

- O'tgan yili biroz "nastroy" etmagani uchun shunday holat ro'y bergandi. Joriy mavsumda esa ushbu kamchilikning oldini olishga harakat qilamiz.