JCH-2026 qurasi oldidan. Anvar G'ofurov: "Mundialda shov-shuv qilishga qodir bo'lgan terma jamoamiz shakllandi"

O'zbekiston terma jamoasi tarixda ilk bor mundialda qatnashadi. Shunday ekan, o'zbek futboli ommasining nigohi ushbu marosimga qaratiladi. Biz esa qura oldidan sobiq futbolchi Anvar G'ofurovning fikrlari bilan qiziqdik. 

"Agar biz guruhdan chiqishni maqsad qilgan bo'lsak, osonroq raqiblar tushgani maqul bo'lardi. Agar biz o'z terma jamoamizni kuchli raqib terma jamoalarga qarshi ko'rish va taqqoslash niyatida bo'lsak, har bir qitaning eng nomdor jamoalariga tushganimiz yaxshi bo'lardi.

Rostini aytsam, menga umuman farqi yo'q — qaysi terma jamoalar biz bilan bir guruhdan o'rin oladi. Aniq bilamanki, men maza qilib terma jamoamizga muxlislik qilaman.

Chunki aniq bilishimiz kerak: JCHda oson raqib bo'lmaydi. Ha, jamoalar soni ko'paydi, lekin ular ham bizning terma jamoamiz kabi saralashlardan o'tgan.

Ishonaman, Jahon chempionatida shov-shuv qilishga qodir terma jamoamiz shakllangan — 2022 yilgi Marokash terma jamoasi kabi. Qolaversa, omad ham kerak bo'ladi", – deydi Anvar G'ofurov.