Jahongir Mehmonov: “Ikkinchi davradagi ilk o'yinimni o'tkazaman”

Ushbu turda Farg'onaning “Neftchi” jamoasi o'z uyida Toshkentning “Paxtakor” jamoasini qabul qiladi. Ushbu uchrashuv oldidan mezbonlar jamoasi futbolchisi Jahongir Mehmonov o'z fikrlarini bildirdi.

“Ushbu uchrashuvga yaxshi tayyorgarlik ko'rdik. “Paxtakor” yaxshi shakllangan jamoa. Mana shu holatni inobatga olgan holda mashg'ulotlarda ko'proq ter to'kdik. Ayni damda “sherlar” yaxshi sport formada. CHempionatimizda biroz tanaffus yuzaga kelganidan unumli foydalandik. Mashg'ulotlarda ko'proq himoya va hujum chizig'imizni kuchaytirish bo'yicha ishlar olib bordik. “Paxtakor” ustidan g'alaba qozonish uchun bor kuchimiz bilan harakat qilamiz. Raqiblarimizni kerakli darajada o'rgandik, deb o'ylayman. Bugungi uchrashuvda bizga Abbos Mahstaliev va Muhsin Ubaydullaev yordam bera olmaydi.

To'g'ri, bundan avvalgi turda safarda “Obod” jamoasiga imkoniyatni boy bergandik. Bu-futbol! Kimdir g'alaba qozonadi yana kimdir mag'lub bo'ladi. G'alaba qozonsak barcha xursand bo'ladi, mag'lub bo'lsak barcha futbolchilar tushkun kayfiyatga tushib qoladi. Mag'lub bo'lishni hech bir futbolchi istamaydi. Bugun faqat g'alaba qozonish uchun maydonga chiqamiz. Bugungi raqiblarimiz ikkinchi davrada ancha mazmunli o'yin ko'rsatishmoqda. Lekin bizga ham ochko kerak. Hozir barcha jamoalar faqat g'alaba qozonish uchun maydonga tushmoqda. Olgan jarohatimdan so'ng, bugun ikkinchi davradagi ilk o'yinimni o'tkazaman”, - deydi “Neftchi” jamoasi futbolchisi Jahongir Mehmonov.

Jahongir Sotvoldiev