Islom Ismoilov: "Uchrashuvdan avval futbolchilarda kuchli hayajon bor edi. Xitoy Taypeyining o'yinini stadiondan kuzatdik"

Unda o'smirlar terma jamoamiz Falastinga qarshi maydonga chiqdi va yirik hisobda g'alaba qozondi. Ertaga vakillarimiz mezbon Xitoy Taypeyi bilan kuch sinashadi. Mazkur o'yin oldidan terma jamoa ustozi Islom Ismoilovning fikrlarini tingladik. 

"Albatta, birinchi uchrashuv doim qiyin bo'ladi. Futbolchilarda hayajon yuqori edi, chunki ular ham bu musobaqaning masuliyatini, muhimliligini his qilib turishgandi. SHunga qaramasdan ilk daqiqalardan o'yin nazoratini qo'lga olishdi va ko'rsatmalarni to'liq bajarishdi. Raqibni o'rganish jarayonida asosan uzun paslar bilan o'ynalishini ko'rgandik va shunga asosan ikkinchi zonada himoyalandik. Bu ustida mashg'ulotlarda bir qancha taktik ishlanmalarni amalga oshirgan edik. 

Falastinga qarshi bahsga tayyorlanish uchun  bizda etarlicha vaqt bo'ldi. Tayvanga ertaroq kelganimiz moslashishda engillik berdi deya olaman. To'g'ri, dastlabki kunlarda qiyinchiliklar yuzaga keldi. Bu ko'proq havo namligi bilan bog'liq edi. Tibbiyot bo'limi buning ustida qattiq ish olib borishdi. Ovqatlar masalasidagi muammolarni bartaraf etish uchun O'FA tomonidan amaliy yordam berib kelinmoqda. 

Ertangi raqibimiz Xitoy Taypeyining Iroq bilan o'yinini stadiondan kuzatdik. Raqibning xato va kamchiliklarini tahlil qilib chiqmoqdamiz. Bizda bir kun vaqt bor. Ertaga o'z imkoniyatlarimizdan maksimal foydalanishga va g'alaba qozonishga harakat qilamiz",- deydi Islom Ismoilov.