Ilhom Yunusov: "Terma jamoadan taklif olish har qanday futbolchini xursand qiladi"

Qarshining "Nasaf" klubidagi yorqin o'yinlari orqali yarim himoyachi Ilhom Yunusov ham bu yig'inga chaqiruv oldi. Hamkorimiz "Futbol Ekspress" gazetasi muxbiri Yunusovdan intervyu oldi. Uning asosiy qismini sizlarga taqdim etamiz.

- Klubdagi faol o'yinlaringiz tufayli Mirjalol Qosimov etiboriga tushib Vetnamga qarshi o'yindan oldingi yig'inga chaqiruv oldingiz. Bu chaqiruvni qanday qabul qildingiz?
- Albatta, terma jamoadan taklif kelsa, har qanday futbolchi xursand bo'ladi. Milliy terma jamoada kim ham o'ynashni xohlamaydi deysiz! SHu bois taklifdan mening ham boshim osmonga etdi. Menga ishonch bildirib taklif etishgan ekan, o'zimni ko'rsatishga harakat qilaman.

- Ayni paytda 31 yoshdasiz. Bunday yoshdagi futbolchilarning terma jamoadan chaqiruv kutishlari qiyin. Siz ham buni kutmaganmidingiz?
- To'g'risini aytsam, terma jamoadan taklif tushadi deb o'ylamagandim. Bu men uchun kutilmagan hol bo'ldi. O'z o'yinim bilan terma jamoa murabbiylari etiboriga tushganimdan mamnunman.


Bobur Tursunov suhbatlashdi.