Igor SHkvirinning “Surxon”dagi faoliyatiga nazar

Yani bungacha “Surxon” bosh murabbiyi sifatida ishlab kelgan Igor SHkvirin jamoa bilan xayrlashdi. Bizda ko'pincha murabbiylarning ishdan olinishi natija bilan bog'liq bo'ladi. Ishqibozlarga yaxshi malumki, “Surxon” jamoasini bu yilgi chempionatga Dilshod Nuraliev tayyorlagandi. Asosan yoshlar bilan ishlash hadisini olgan Nuraliev o'z oldiga Superligaga chiqish vazifasini qo'ygan Termiz jamoasini qisqa vaqt ichida, kurashchan qilib qo'ygandi. Nuraliev boshchiligida jamoa xatto 1-o'ringa ham chiqib olgandi. Ammo shunga qaramay 18 iyun kuni Dilshod Nuraliev bizga nomalum sabablarga binoan ariza yozib, jamoani tark etdi. Uning o'rniga Igor SHkvirin taklif etildi. “Olmaliq”dagi samarali faoliyati orqali xurmat qozongan Igor Anatolevichda PRO-Ligada ishlash tajribasi biroz kamligi bilinib qoldi. Garchi SHkvirin o'z yoniga ilgari PRO-Liga klublarini boshqargan murabbiylar Abdumalik Hakimov, Gennadiy Kochnev va Abdumajid Toirov singari malakali yordamchilarni olgan bo'lsada, “Surxon” jamoasi muxlislar va rahbariyat kutgan natijani bera olmadi.

Yozgi transfer oynasida SHkvirin katta tavakkalga qo'l urib, katta xatoga yo'l qo'yganini kechroq tushunib etdi. Boisi mavsumning birinchi qismida “Surxon”ning asosiy figuralari bo'lgan Ibrohim Rahimov, Islom Inomov, Suhrob Nematov va Farhod Tojiev singari tajribali futbolchilarning xizmatidan ortiq foydalanmaslikka qaror qilib, ularning o'rniga nisbatan yosh bo'lgan futbolchilarni olib kelishga qaror qildi.

Bu bilan Igor Anatolevich tarkibni deyarli yangitdan tuzdi. Davralar oralig'ida tarkibni butunlay yangilash esa hamisha ham o'zini oqlayvermasligiga oldin ko'p guvoh bo'lganmiz. Boz ustiga “Surxon” safiga yozda kelib qo'shilgan futbolchilar, jamoadan ketganlardan bir bosh ustun yoki ular bilan teng saviyada emasdi. Natijada SHkvirin noto'g'ri olib borilgan selekciya tufayli muammoga duch kelaverdi. Surxondaryolik talabchan muxlislar esa jamoadan hamisha g'alaba kutadi. Ular jamoani kelasi yil Superligada ko'rishni juda-juda istamoqda. Buning uchun har bir o'yinda g'alaba qozonish talab etiladi.

Yuqorida aytib o'tganimizdek, Igor SHkvirin “Surxon”da rasman 18 iyundan ishga kirishib, 5 sentyabr kuni istefoga chiqdi. 54 yoshli murabbiyning Termizdagi faoliyati uch oyga ham bormadi. Bu vaqt oralig'ida “Surxon” SHkvirin boshchiligida 7ta rasmiy uchrashuv o'tkazib, shundan 3tasida g'alaba, 2ta durang va 2ta mag'lubiyat qayd etdi.

21.06.2018. 16-tur.
Surxon - Orol - 7:0 (2:0)

25.06.2018. 17-tur.
“SHo'rtan” – “Surxon” - 0:1 (0:0)

09.08.2018. 20-tur.
“Surxon” – “SHo'rtan” - 1:3 (1:2)

15.08.2018. 21-tur.
“Surxon” – “Orol” - 4:0 (2:0)

20.08.2018. 22-tur.
“Surxon” – “Andijon” - 0:3 (0:2)

26.08.2018. 23-tur.
“Norin” – “Surxon” - 1:1 (0:0)

04.09.2018. 24-tur.
“Surxon” – “Dinamo” - 1:1 (0:1)